ОХУ-ын Дагестаны Бүгд Найрамдах Улсад сүүлийн хоёр долоо хоног дараалан аадар бороо орж, үер буусны улмаас наад зах нь гурван хүн амь үрэгдэж, олон мянган иргэнийг нүүлгэн шилжүүлээд байна. Тус бүс нутагт хаврын шар усны үер болон усархаг бороо хавсарч, нөхцөл байдлыг хүндрүүлжээ.
Орон нутгийн эрүүл мэндийн байгууллагын мэдээлснээр, өмнөд хэсгийн Кирки тосгонд хөрсний нуранги үүсэж нэг байшин нурсны улмаас нэг эмэгтэй амиа алдсан байна. Мөн голын усанд хоёр автомашин урссан золгүй явдал гарч, нэг эмэгтэй, нэг хүүхэд живж амиа алджээ. Аврагчид эдгээр автомашинаас нэг хүүхэд оролцуулан нийт дөрвөн хүнийг аварч чадсан байна.
Нийслэл Махачкала хотод хөрсний элэгдлээс болж зургаан давхар орон сууцны барилгын туслах байгууламж нурж, тухайн барилга өөрөө нурах эрсдэл үүссэн тул оршин суугчдыг яаралтай нүүлгэн шилжүүлжээ. Дагестаны тэргүүн Сергей Меликов энэхүү гамшгийн нэг шалтгааныг голын голдирол дагуух “болгоомжгүй” барилгажилттай холбон тайлбарлаж, зарим байшингуудыг шууд голын эрэг дээр барьсан нь усны урсгалыг хааж, гудамж талбайг үерлэхэд хүргэсэн гэж шүүмжилсэн байна.
Дэрбэнт дүүргийн Гэджух усан сангийн далан сэтэрсний улмаас ойр орчмын зургаан тосгоны 4000 гаруй иргэнийг аюулгүй бүсэд шилжүүлээд байгаа аж. Үерийн гамшиг хөрш Чечня улсад ч нөлөөлж, зам гүүр эвдэрч, цахилгаан тасрахад хүрчээ. Өнгөрсөн гуравдугаар сарын сүүлээр эхэлсэн энэхүү байгалийн гамшиг нь сүүлийн 100 гаруй жилд тохиолдоогүй их хэмжээний үер байсныг мэргэжилтнүүд онцолж байна. Одоогоор Дагестаны 12 мужид онц байдал зарлаад байгаа бөгөөд цаг агаарын таагүй байдал үргэлжлэх төлөвтэй байгаа тул иргэдийг сонор сэрэмжтэй байхыг анхааруулж байна.
