Мурманск мужийн захирагч Андрей Чибис аннексийн Крымд болсон онгоцны ослоор Оросын Тэнгисийн цэргийн өндөр албан тушаалтан амь үрэгдсэнийг албан ёсоор баталлаа.
Өнгөрсөн гуравдугаар сарын 31-ний өдөр Севастополь хотын ойролцоо хад мөргөж унасан Антонов Ан-26 цэргийн тээврийн онгоцонд байсан нийт 29 хүн бүгд амь үрэгдсэн байна. ОХУ-ын Батлан хамгаалах яамны мэдээлснээр уг онгоц нь төлөвлөгөөт нислэг үйлдэж байсан бөгөөд гадны халдлагад өртсөн шинж тэмдэг илрээгүй аж. Холбооны мөрдөн байцаах байгууллага аюулгүй байдлын дүрэм журам зөрчигдсөн эсэхэд эрүүгийн хэрэг үүсгэн шалгаж эхэлжээ.
Мурманск мужийн захирагч Андрей Чибис мягмар гарагт болсон хурлын үеэр тус ослоор Хойд флотын холимог нисэхийн корпусын командлагч, дэслэгч генерал Александр Отрощенко амиа алдсаныг мэдэгдэв. Тэрээр ослоос хэдхэн хоногийн өмнө генералтай биечлэн уулзаж байснаа Интерфакс агентлагт ярьсан байна.
BBC News Russian агентлагийн мэдээлснээр 2022 онд Украин руу хийсэн довтолгоо эхэлснээс хойш амь үрэгдсэн Оросын генералуудын тоо ийнхүү 14-т хүрч байна. Александр Отрощенко нь Хойд флотын агаарын цэргийн хүчийг удирдаж байсан туршлагатай офицер байсан юм.
