Украйны алсын тусгалтай дронууд Оросын Хар тэнгис дэх газрын тосны экспортын хамгийн том зангилаа болох Новороссийск хотын Шесхарис терминалыг дахин онилж, гал түймэр гаргасан тухай олон улсын хэвлэлүүд мэдээллээ. Энэхүү байгууламж нь ОХУ-ын өмнөд бүс нутгийн эрчим хүчний экспортын стратегийн чухал ач холбогдолтой цэг юм.
2026 оны 4-р сарын 6-ны өдрийн байдлаар гарсан мэдээллээр, Украины “Мажар” нэгжийн нисгэгчгүй онгоцнууд Новороссийск боомтод байрлах Оросын “Адмирал Макаров” фрегат хөлөг онгоц болон Шесхарис терминалд цохилт өгсөн байна. Гэрчүүдийн мэдээлснээр боомтын бүсэд хүчтэй дэлбэрэлт сонсогдож, гал гарсан бөгөөд энэ нь сүүлийн хэдэн сарын хугацаанд тус терминалд халдсан гурав дахь удаагийн томоохон довтолгоо болж байна.
Украин улс сүүлийн долоо хоногуудад Оросын эрчим хүчний дэд бүтцэд, тэр дундаа Балтийн тэнгис дэх Уст-Луга болон Приморск боомтуудад чиглэсэн агаарын цохилтоо эрчимжүүлээд байгаа юм. Эдгээр дараалсан довтолгоонуудын улмаас:
- 3-р сарын сүүлээр Оросын газрын тос, байгалийн хийн нийт орлого өнгөрсөн оны мөн үетэй харьцуулахад 43 хувиар буурч, 617 тэрбум рубль болжээ.
- Балтийн тэнгис дэх Уст-Луга терминалын үйл ажиллагаа дроны халдлагын улмаас хэд хоногоор саатаж, дөнгөж хязгаарлагдмал хүчин чадлаар ажиллаж эхэлсэн байна.
- Шинжээчдийн үзэж буйгаар, Оросын газрын тосны экспортын хүчин чадал энэ сард нийтдээ 40 орчим хувиар саарсан гэх тооцоолол гарчээ.
Украины Зэвсэгт хүчний Жанжин штабаас эдгээр байгууламжуудыг Оросын армийг түлшээр хангадаг цэргийн стратегийн зорилтот объект гэж үзэн цохилт өгч байгаагаа тайлбарласан. Энэхүү нөхцөл байдал нь дэлхийн зах зээл дээрх газрын тосны нийлүүлэлтэд тодорхой хэмжээний эргэлзээ төрүүлж, үнэ хэлбэлзэхэд нөлөөлж байна.
