БНХАУ-ын засаг захиргаа ОХУ-ын иргэдэд зориулсан визгүй зорчих хөнгөлөлтийг нэг жилийн хугацаатайгаар сунгах шийдвэр гаргаснаа албан ёсоор баталгаажууллаа. Хоёр улсын хооронд хэрэгжиж буй энэхүү харилцан визгүй зорчих журам 2026 оны есдүгээр сарын 14-ний өдрийг хүртэл хүчин төгөлдөр үйлчлэхээр болоод байна.
Шинэчилсэн зохицуулалтын дагуу хоёр улсын иргэд аялал жуулчлал, бизнес, гэр бүлийн айлчлал болон соёл, шинжлэх ухаан, спортын арга хэмжээнд оролцох зорилгоор 30 хүртэлх хоногийн хугацаатайгаар визгүй зорчих боломжтой юм. ОХУ-ын Ерөнхийлөгч Владимир Путин холбогдох зарлигт 2025 оны 12 дугаар сарын 1-ний өдөр гарын үсэг зурснаар БНХАУ-ын иргэд ч мөн адил нөхцөлөөр Орос улсад визгүй нэвтрэх эрхтэй болсон билээ.
БНХАУ-аас ОХУ-д суугаа Элчин сайд Жан Ханхуй энэхүү хөнгөлөлтийг хоёр улсын стратегийн түншлэлийн чухал илрэл гэж тодорхойлоод, цаашид байнгын журам болгох чиглэлд ажиллах сонирхолтой байгаагаа илэрхийлсэн байна. 2026 оны эхний улирлын байдлаар хоёр улсын хилээр нэвтрэх зорчигчдын урсгал түүхэн дээд хэмжээндээ хүрч, ялангуяа “Сар шинийн баяр”-ын үеэр аялал жуулчлалын эрэлт огцом нэмэгджээ.
Шинжээчдийн дүгнэж буйгаар, энэхүү визний хөнгөлөлт нь зөвхөн аялал жуулчлал төдийгүй хил орчмын худалдаа, цахим худалдааны салбарт томоохон түлхэц болж байна. Хятад, Оросын хооронд байгуулагдсан 30 хоногийн визгүй зорчих энэхүү тусгай хэлэлцээр нь Хятад улсаас бусад 46 оронд олгосон визний хөнгөлөлтөөс тусдаа, бие даасан зохицуулалтаар хэрэгжиж байгаагаараа онцлог юм.
