Ойрхи Дорнодод үүссэн хурцадмал байдлыг намжаах зорилгоор Пакистан улсаас зуучлан санал болгосон гал зогсоох төлөвлөгөөг Иран улс хэлэлцэж байгаа ч Ормузын хоолойг нээх асуудлыг түр зуурын зохицуулалттай холбохгүй гэдгээ мэдэгдлээ.
Ираны дээд албан тушаалтан Ройтерс агентлагт өгсөн ярилцлагадаа, АНУ-ын Ерөнхийлөгч Дональд Трампын зүгээс Ираны эрчим хүчний байгууламжуудад цохилт өгөхөөр тогтоосон эцсийн хугацаа ойртож буйг онцлов. Тегераны зүгээс АНУ-ыг байнгын гал зогсоох хэлэлцээрт үнэн сэтгэлээсээ хандаж буйд эргэлзэж байгаа бөгөөд гадны шахалт, тулган шаардалтын дор шийдвэр гаргахгүй гэдгээ илэрхийлсэн байна.
Ираны Гадаад хэргийн яамны хэвлэлийн төлөөлөгч Эсмаил Багхаей хэлэхдээ, дипломат хэлэлцээ нь “цэргийн халдлага үйлдэх заналхийлэл болон эцсийн хугацаатай огт нийцэхгүй” гэдгийг тэмдэглэв. Тэрээр Иран улс өөрийн үндэсний эрх ашгаа хамгаалах байр суурьтаа хатуу зогсох бөгөөд үүнийг буулт хийх дохио биш, харин өөртөө итгэлтэй байдлын илрэл гэж үзэх ёстойг санууллаа.
Ерөнхийлөгч Дональд Трамп Иранд хандан “Ормузын хоолойг нээ, эсвэл тамд амьдрах болно” хэмээн хатуу мэдэгдсэн ч хэлэлцээ үргэлжилж байгааг дурдсан юм. Тэрээр өмнө нь тогтоосон 10 хоногийн хугацаагаа сунгаж, мягмар гарагийн оройн 20:00 цаг (Лхагва гарагийн шилжих шөнийн 01:00 цаг) хүртэл шинэ хугацаа тогтоосон байна.
Хэлэлцээнд ойр эх сурвалжуудын мэдээлснээр, Пакистаны боловсруулсан “Исламабадын хэлэлцээр” хэмээх хоёр шаттай төлөвлөгөөг талуудад хүргүүлжээ. Уг төлөвлөгөөнд:
- Нэн даруй гал зогсоож, Ормузын хоолойг нээх;
- Дараагийн 15-20 хоногийн дотор Исламабад хотод биечлэн уулзаж, илүү өргөн хүрээний урт хугацааны тохиролцоонд хүрэх асуудлууд багтсан байна.
Одоогоор талууд уг төлөвлөгөөг хүлээн авсан бөгөөд эцсийн шийдвэр Дональд Трампын тогтоосон хугацаанаас өмнө гарах эсэх нь дэлхий нийтийн анхаарлын төвд байна.
