АНУ-аас санал болгосон гал зогсоох тохиролцоог Иран хэдий хүлээн авахаас татгалзсан ч дайныг бүрмөсөн зогсоох шаардлагатай гэж үзэж байгаагаа илэрхийлжээ. Иран улс байнгын энх тайвныг эрмэлзэж, Хормузын хоолойг түр гал зогсоох нөхцөлөөр хурдан нээхэд дарамт шахалтад орохгүй гэдгээ товойлгов.
Пакистаны зуучлалаар АНУ-ын саналыг хүлээн авсан Иран, гал зогсоохын оронд бүс нутгийн дайныг зогсоох, хоригийг цуцлах, сэргээн босголтыг дэмжих зэрэг 10 зүйлийг тусгасан хариуг хүргүүлсэн байна. АНУ нь 45 хоногийн гал зогсоох хэлэлцээр байгуулж, улмаар энх тайвны гэрээнд хүрэх зорилготой байсан ч Иран улс удаан хугацааны шийдлийг илүүд үзэж байна.
АНУ-ын Ерөнхийлөгч Дональд Трамп Хормузын хоолойг нээхгүй тохиолдолд Ираны эрчим хүчний байгууламж, гүүрүүдийг устгах аюул заналхийлж, улмаар Иран улсыг “чулуун зэвсгийн үе”-рүү нь буцаана гэж мэдэгдсэн. Тэрээр 4-р сарын 7-ны мягмар гарагийн 20:00 цаг гэхэд тохиролцоонд хүрэхгүй бол “цахилгаан станц, гүүрний өдөр” болгох болно гэдгээ анхааруулаад байна. Үүний хариуд Ираны парламент Ираны эсрэг “болгоомжгүй үйлдэл” бүс нутгийг бүхэлд нь шатаана хэмээн хариу мэдэгдсэн.
Энэхүү хурцадмал байдлын дунд Ираны Хувьсгалт гвардын корпусын (IRGC) тагнуулын газрын дарга Мажид Хадеми 4-р сарын 6-нд Тегеран хотод АНУ-Израилын хамтарсан агаарын цохилтын улмаас амь эрсэдсэн нь нөхцөл байдлыг улам хурцатгав. Түүнчлэн АНУ-Израилын цэргийн ажиллагааны үеэр Ираны Бушер цөмийн цахилгаан станцын ойролцоо дөрөв дэх удаагаа пуужингийн цохилт өгсөн нь Олон улсын атомын эрчим хүчний агентлагийн (IAEA) тэргүүн Рафаэль Гроссиг “ноцтой цацраг идэвхт осол” гарч болзошгүйг хатуу анхааруулахад хүргээд байна.
