Энэ сарын 18-нд товлогдоод байсан боксын ертөнцийн анхаарлын төв дэх тулаануудын нэг болох Каллум Смит болон Дэвид Морелл нарын тулаан тодорхойгүй хугацаагаар хойшлогдлоо. Английн боксчин Каллум Смит бэлтгэлийн явцад хүнд бэртэл авсан тул тулаанаас татгалзахаас өөр аргагүй болсныг албаны эх сурвалжууд мэдээлэв.
Каллум Смит хамгийн сүүлд 2025 оны хоёрдугаар сард Жошуа Буатсиг ялж, WBO холбооны түр аваргын бүсийг хүртсэнээс хойш рингэнд гараагүй байсан юм. Тэрээр нэг жил гаруйн дараа төрөлх Ливерпүүл хотноо шүтэн бишрэгчдийнхээ өмнө эргэн ирэлтээ хийхээр төлөвлөж байсан ч тулаан болохоос ердөө хоёр долоо хоногийн өмнө ийнхүү бэртэлд бүдэрлээ.
Смитийн хувьд 2018 онд WBC холбооны супер дунд жингийн дэлхийн аварга болж байсан бөгөөд 2020 онд алдарт Канело Альварест бүсээ алдсан түүхтэй. Үүний дараа жин өгсөж, хагас хүнд жинд хүч үзэж эхэлсэн ч 2024 оны эхээр Артур Бетербиевын эсрэг хийсэн тулаанд хүнд цохилтоор ялагдаж байв.
Түүний өрсөлдөгч болох WBA холбооны “Regular” аваргын бүсийг эзэмшиж байсан Куба улсын боксчин Дэвид Мореллтой хийх энэхүү тулаан нь Смитийн хувьд хоёр өөр жинд дэлхийн аварга болох зорилгодоо хүрэх шийдвэрлэх алхам байсан юм. Морелл нь мэргэжлийн боксын замналдаа зөвхөн Дэвид Бенавидест нэг удаа ялагдаж байсан хүчирхэг өрсөлдөгч билээ. Одоогоор зохион байгуулагчдын зүгээс тулааныг дахин хэзээ товлох эсвэл Мореллтой өөр боксчин тулалдуулах эсэх талаар албан ёсны шийдвэр гаргаагүй байна.
