Гариг үүсэх эхэн үеийн цөм бүрэлдэх явцад амьдралын эх үүсэлд шаардлагатай химийн элементүүдийн хувь заяа хэрхэн шийдэгддэгийг шинэ судалгаагаар тогтоожээ.
Швейцарийн Цюрихийн Технологийн Их Сургуулийн (ETH Zurich) судлаачдын үзэж байгаагаар фосфор, азот зэрэг элементүүд тухайн гаригийн цөм үүсэх явцад тодорхой хэмжээнд хадгалагдан үлдэх нь амьдрал цэцэглэх үндсэн нөхцөл болдог байна. Фосфор нь ДНХ, РНХ-ийн бүтэц болон эсийн энергийн зохицуулалтад оролцдог бол азот нь уургийн гол бүрэлдэхүүн хэсэг болдог тул эдгээргүйгээр амьдрал үүсэх боломжгүй юм.
Судалгааг ахалсан Крэйг Уолтон болон түүний багийнхан гаригийн цөм бүрэлдэх үед хүчилтөрөгчийн хэмжээ ямар байх нь фосфор, азотыг гадаргуу дээр хадгалж үлдэхэд шийдвэрлэх үүрэгтэйг онцолжээ. Дэлхий дээр ойролцоогоор 4.6 тэрбум жилийн өмнө тохиолдсон энэхүү химийн үйл явц нь манай гаригийг амьдрал үүсэхэд хамгийн таатай “азтай” эхлэлийг олж авахад нөлөөлсөн байна.
Гаригийн цөм үүсэх үед хүчилтөрөгч хангалтгүй байвал фосфор нь төмөр зэрэг хүнд металлуудтай нэгдэн цөм рүүгээ шилжиж, гадаргуу дээр амьдрал тэтгэх фосфоргүй болдог. Харин хүчилтөрөгч хэт их байвал фосфор мантид үлдэх боловч азот нь агаар мандалд дэгдэж алга болох эрсдэлтэй аж.
Судлаачид фосфор болон азот хоёулаа зохистой хэмжээнд үлдэх тэрхүү нөхцөлийг “химийн алтанзул цоохор бүс” (chemical Goldilocks zone) хэмээн нэрлэжээ. Дэлхий яг энэ бүсэд багтаж чадсан бол Ангараг зэрэг бусад гаригууд энэ бүсээс гадуурх нөхцөлд үүссэн нь амьдрал үүсэх боломжийг хязгаарласан гэж үзэж байна. Энэхүү нээлт нь харь гаригаас амьдрал хайх эрдэмтдийн арга барилд шинэ чиглэл өгөхөөс гадна химийн найрлагын хувьд өөр системүүд амьдрал хайхад тохиромжгүй байж болохыг сануулж байгаа юм.
