Хүнд жингийн “айдас төрүүлэгч” хэмээгдэж байсан Конго улсын боксчин Мартин Баколе рингэнд эргэн ирэх товлогдсон тулаанаа тодорхойгүй шалтгаанаар цуцалж, бокс сонирхогчдыг гайхшруулав. Тэрбээр 2025 оны тавдугаар сард Эфе Ажагбатай тэнцсэнээс хойш нэг жил орчмын хугацаанд тулаан хийгээгүй байгаа юм.
Баколе өмнө нь Карлос Такам, Жаред Андерсон нарыг хүнд цохилтоор буулган авч, олны анхаарлыг татаж байсан ч Даниел Дюбуагийн бэртлийн улмаас Жозеф Паркертай богино хугацааны бэлтгэлтэй тулалдаж, хоёрдугаар үед нокаутад орсноос хойш амжилт нь саараад байгаа билээ. Түүний ээлжит өрсөлдөгчөөр Италийн хүчтэй боксчин Гвидо Вианелло тодорсон байсан ч тулаан ийнхүү цуцлагдлаа.
Тайсон Фьюри, Жозеф Паркер нартай бэлтгэл сургуулилт хийдэг Вианелло өөрийн Инстаграм хуудсаараа дамжуулан Баколег тулаанаас татгалзсан тухай мэдэгдсэн байна. Түүний хэлснээр талууд тавдугаар сарын 23-нд Египетийн Гиза хотод тулалдахаар бүх нөхцөлөө тохирч, гэрээнд гарын үсэг зурсан байжээ.
“Мартин ямар нэгэн тайлбаргүйгээр хамгийн сүүлийн мөчид тулаанаас татгалзлаа. Түүнээс болон түүний багийнхнаас ямар ч хариу ирсэнгүй. Би өглөө бүр бэлтгэлээ хийсээр байсан. Хэрэв та тулалдахаас айж байгаа бол долдугаар сар эр зоригоо эргүүлэн олоход тохиромжтой хугацаа байх болно” хэмээн Вианелло шүүмжлэлтэйгээр бичжээ.
Гвидо Вианелло өнгөрсөн жил Ричард Торрез Жуниорт ялагдсан ч Алексис Барриере болон Арсланбек Махмудов нарыг дараалан ялж, карьерынхаа өгсөх шатанд яваа юм. Энэхүү тулаан нь ялагчийн хувьд хүнд жингийн чансаанд ахих томоохон боломж байсан билээ.
Тавдугаар сарын 23-нд болох Александр Усик болон Рико Верхоевен нарын тулааны үдшийн үндсэн хөтөлбөр батлагдсан бөгөөд Баколегийн талаас одоогоор албан ёсны ямар нэгэн тайлбар хийгээгүй байна.
