Нээлттэй ертөнц бүхий Crimson Desert тоглоом худалдаанд гараад удаагүй байгаа ч зарим улаан фэнүүд нь аль хэдийн бүх даалгаврыг нь гүйцэтгэж амжжээ. Reddit-ийн хэрэглэгч TioZer0 дөрөвдүгээр сарын 6-ны өдөр тоглоомыг 100 хувь дуусгаж, “Platinum” цомыг хүртсэн анхны тоглогч болсон байна.
Тэрбээр тоглоомын өргөн уудам ертөнц дэх 76 босс, 30 гаруй мини тоглоом болон бүх төрлийн зэвсэг, хуяг дуулгыг цуглуулахад нийт 305 цаг зарцуулжээ. Сонирхолтой нь, тэрбээр энэ хугацааныхаа 60 гаруй цагийг зөвхөн шавьж цуглуулах, загасчлах зэрэг туслах даалгаварт зориулсан байна.
Crimson Desert худалдаанд гараад ердөө 18 хонож байгааг тооцвол TioZer0 өдөрт дунджаар 13-16 цагийг дэлгэцийн өмнө өнгөрүүлсэн гэсэн үг юм. Өмнө нь God of War Ragnarök болон Borderlands 4 зэрэг тоглоомуудыг ч мөн ийм хурдаар дүүргэж байсан туршлагатайгаа тэрбээр хуваалцжээ.
Тоглоомыг хөгжүүлэгч Pearl Abyss компанийн Маркетингийн захирал Уилл Пауэрс энэхүү амжилтыг сонсоод гайхаж байгаагаа илэрхийлсэн байна. Учир нь тус тоглоомын агуулга, гүйцэтгэх даалгаврууд маш их тул богино хугацаанд бүрэн дуусгана гэдэг амаргүй сорилт юм.
Crimson Desert нь одоогоор PlayStation 5, Xbox Series X/S болон PC платформ дээр тоглогчдын хүртээл болоод байна.
