Сагсан бөмбөгийн ертөнцөд томоохон өөрчлөлт авчрахуйц нэгэн үйл явдал өрнөж байна. NBA болон ЕвроЛигийн удирдлагууд Европын сагсан бөмбөгийн ирээдүйн бүтэц, хамтын ажиллагааны талаар түүхэн хэлэлцээ хийж эхэллээ.
ЕвроЛигийн шинээр томилогдсон гүйцэтгэх захирал Чус Буэно энэ долоо хоногт NBA-гийн төлөөлөгчидтэй уулзахаар төлөвлөжээ. Өмнө нь ЕвроЛиг NBA-гийн хамтын ажиллагааны саналаас татгалзаж байсан ч шинэ удирдлагатай болсноор бүх төрлийн хамтын ажиллагааны боломжийг нээлттэй хүлээж авахаа илэрхийлсэн байна. Үүнд хоёр лигийн нэгдэл эсвэл NBA-гаас ЕвроЛигийн хувьцааг худалдан авах зэрэг хувилбарууд багтаж байгаа юм.
NBA Европ даяар шинэ багуудыг байгуулахад 500 саяас 1 тэрбум ам.долларын хөрөнгө оруулалт татах зорилготой байгаа бөгөөд Лондон, Парис, Милан зэрэг хотуудад баг байгуулах сонирхолтой хөрөнгө оруулагчидтай аль хэдийн холбогджээ. Мөн NBA нь ЕвроЛигийн одоогийн зарим багуудыг, тухайлбал Испанийн Реал Мадрид болон Туркийн Фенербахче зэрэг гигантуудыг өөрийн төсөлдөө татан оролцуулах сонирхолтой байгаа аж.
Чус Буэногийн удирдлага дор ЕвроЛиг нь гишүүн багуудынхаа эрхийг тогтворжуулж, ирэх гурван жилийн хугацаанд таван шинэ баг нэмж оруулан өргөжин тэлэх төлөвлөгөөтэй байна. Тэрээр NBA-тай хийх гэрээнээс үл хамааран ЕвроЛигт шинэчлэл хийх шаардлагатайг онцолсон бөгөөд FIBA болон орон нутгийн лигүүдтэй харилцаагаа бэхжүүлж, Европын сагсан бөмбөгийн экосистемийг бүрэн бүтэн хадгалахыг зорьж байна.
Түүний үзэж буйгаар хамгийн төгс хувилбар нь NBA болон ЕвроЛиг нэгдэж, нэгдсэн томоохон лиг байгуулах явдал юм. Чус Буэно нь NBA-гийн Европ дахь үйл ажиллагаанд 12 жил ажиллаж байсан туршлагатай бөгөөд одоогийн үүрэгтээ ЕвроЛигийг тогтворжуулах, хоёр талын байгууллагын хооронд гүүр болж ажиллахыг эрмэлзэж байна. Ингэснээр NBA-гийн удирдлагын арга барил, капитал Европын уламжлалт багуудтай нэгдэж, дэлхийн сагсан бөмбөгийн газрын зургийг шинэчлэх боломж бүрдэх юм.
