Хиймэл оюун ухааны (AI) чатботууд зарим хэрэглэгчдийг эрүүл мэндийн байдалдаа хэт их санаа зовох буюу “гипохондри” (hypochondria) эмгэгт хөтлөх болжээ. Ливерпүүл хотын оршин суугч Жорж Мэллоны жишээ үүнийг тод харуулж байна. Тэрээр ChatGPT-тэй өдөрт хэдэн цагаар өөрийн шинж тэмдгүүдийн талаар ярилцдаг болсон бөгөөд энэ нь түүнийг ямар нэгэн үхлийн аюултай өвчин туссан мэт төсөөлөхөд хүргэж, айдас түгшүүрийг нь улам хурцатгажээ.
Мэллон эмнэлгийн нарийн шинжилгээгээр ямар ч өвчгүй болох нь тогтоогдсон ч чатботтой ярилцаж, өөрийгөө оношлох оролдлогоо зогсоож чадаагүй байна. Тэрээр хиймэл оюун ухааны хэрэглээнд тодорхой хязгаарлалт байх ёстой байсан хэмээн харамсан өгүүлжээ.
Сэтгэл зүйчдийн тайлбарлаж буйгаар, AI-тай тогтмол ярилцах нь өөрийнхөө таамгийг баталгаажуулах гэсэн буруу зуршлыг бий болгодог байна. Энэ нь асуудлын үндсэн шалтгаан болох сэтгэл түгшүүрийг эмчлэхийн оронд байдлыг улам дордуулдаг аж. Түүнчлэн зарим шинжээчид AI-тай хэт их харилцах нь бодит байдлаас тасарч, төөрөгдөлд орох буюу “AI психоз” гэх эмгэгт хүргэж болзошгүйг анхааруулж байна.
Өнөөдөр эрүүл мэндийн зөвлөгөө өгдөг онлайн нийгэмлэгүүд хиймэл оюун ухаантай хийсэн ярианы тэмдэглэлээр дүүрэх болсон. Зарим хүмүүс AI-г тустай гэж үзэж байгаа ч олонх нь сэтгэл зүйн хувьд хүнд байдалд орж буйгаа илэрхийлсээр байна.
Үүнтэй холбоотойгоор OpenAI компанид хэрэглэгчдийн эрүүл мэнд, хувийн амьдралтай холбоотой хэд хэдэн нэхэмжлэл иржээ. Гэсэн хэдий ч тус компани саяхан хувийн эрүүл мэндийн мэдээлэл дээр суурилсан “ChatGPT Health” загвараа танилцуулсан нь олны дунд маргаан дагуулж байна.
