Америкийн “General Motors” компани 2023-2025 оны загварын 270,000 гаруй Chevrolet Malibu автомашиныг арын харах камерын системд гарсан техникийн саатлын улмаас эргүүлэн татахаар боллоо. Уг гэмтэл нь жолооч нарт үзэгдэх орчны хязгаарлалт үүсгэж, аюулгүй байдалд эрсдэл учруулж болзошгүйг анхааруулж байна.
Америкийн Үндэсний хурдны замын аюулгүй байдлын захиргаанаас (NHTSA) мэдээлснээр, камерын бүрхүүлийн холболтын явцад алдаа гарсны улмаас төхөөрөмж рүү чийг нэвтрэх нөхцөл бүрджээ. Үүний үр дүнд арын камерын дэлгэц дээрх дүрс алдаатай заах эсвэл огт харагдахгүй болох зэрэг хүндрэлүүд үүсдэг байна.
General Motors компанийн зүгээс уг асуудлаас үүдэлтэй ямар нэгэн осол аваар, бэртэл гэмтэл бүртгэгдээгүй байгааг мэдэгдлээ. Гэсэн хэдий ч урьдчилан сэргийлэх үүднээс компанийн ханган нийлүүлэгчтэй хамтран засварлах ажиллагааг эхлүүлээд байна.
Дээрх загварын автомашин эзэмшигчид өөрт ойр байрлах эрх бүхий дилерүүдэд хандаж, арын камерыг үнэ төлбөргүй солиулах боломжтой. Компанийн зүгээс автомашин эзэмшигчдэд албан ёсны мэдэгдлийн захидлыг 5 дугаар сарын 18-наас эхлэн илгээхээр төлөвлөж байгаа бөгөөд хэрэглэгчид Chevrolet-ийн харилцагчийн үйлчилгээ болон NHTSA-ийн тусламжийн утсаар дэлгэрэнгүй мэдээлэл авах боломжтой юм.
