Орчин үеийн мэдээллийн орон зайд хиймэл оюун ухаанаар (AI) бүтээсэн “Лего” загварын суртал ухуулгын дүрс бичлэгүүд эрчтэй тархаж байгаа нь мэдээллийн дайны шинэ хэлбэр ирснийг илтгэж байна. Тухайлбал, Ирантай холбоотой “Explosive News” хэвлэл нь ердөө 24 цагийн дотор хоёр минутын мэргэжлийн түвшний видео бэлтгэх чадвартай болжээ.
Энэ нь үнэн бодит байдлаас илүүтэйгээр алгоритмын түгээлт, хурд болон ойлгомжгүй байдыг чухалчилж буй стратегийн нэг хэсэг юм. Сүүлийн үед АНУ-ын Цагаан ордон ч өөрийн цахим хуудсандаа “удаахгүй нээлттэй” гэсэн утгатай, богино хэмжээний видео байршуулаад удалгүй устгасан нь албан ёсны харилцаа холбооны байгууллагууд хүртэл цахим орчинд “вирусжих”, платформын алгоритмд зохицохын тулд залилах арга барилыг ашиглаж эхэлснийг харуулж байна.
Өнөөдөр интернэтийн нийт урсгалын 51 хувийг автоматжуулсан ботууд эзэлж, хүний үйл ажиллагаанаас найм дахин хурдацтай өсөж байна. Эдгээр системүүд нь чанаргүй болон хуурамч контентыг асар хурдтай түгээж байгаа нь бодит мэдээллийг баталгаажуулах ажлыг цаг хугацааны хувьд хол хоцроож байгаа юм. Олон нийтийн эх сурвалжийг шинжлэн судлах (OSINT) мэргэжилтнүүд бодит байдлыг тогтоохын төлөө ажиллаж байгаа ч мэдээллийн хэт их урсгалд дарагдаж байна.
OSINT сэтгүүлч Мэрьям Ишани “Хэн нэгэн бодолгүйгээр хуурамч мэдээллийг дахин нийтлэхэд бид түүнийг нь няцаах гэж үргэлж хоцорч алхдаг” хэмээжээ. Түүнчлэн Телеграм, X зэрэг платформууд дээрх мэдээллийн цуглуулгууд нь “хуурамч итгэлцлийг” бий болгож байгааг шинжээчид анхааруулж байна.
Геополитикийн нөхцөл байдлаас шалтгаалан “Planet Labs” зэрэг хиймэл дагуулын зургийн компаниуд АНУ-ын Засгийн газрын хүсэлтээр Иран болон Ойрхи Дорнодын бүс нутгийн зургийг нийтлэхээс татгалзах болов. АНУ-ын Батлан хамгаалахын сайд Пит Хегсет “Олон нийтийн эх сурвалж бол юу болсон, болоогүйг тодорхойлох газар биш” гэж мэдэгдсэн нь бодит дүрсний мэдээллийг хязгаарлах замаар бие даан баталгаажуулах чадварыг бууруулж байна. Энэхүү орон зайг хиймэл оюун ухаанаар бүтээсэн “гибрид” контентууд нөхөж байгаа бөгөөд тэдгээрийг танихад улам бүр хэцүү болсоор байна. Хурууны тоо, үсгийн алдаа зэрэг AI-ийг таньдаг байсан хуучин аргууд үр дүнгүй болж, бодит болон зохиомол мэдээлэл холилдсон орчинд “үнэн” гэдэг ойлголт улам бүр бүдгэрч байна.
