Сан Францискогийн буланд саарал халимнууд олноор үхэж байгаа нь далайн биологичдын анхаарлыг татаж, популяцид нь бодит аюул нүүрлэж буйг сануулж байна. 2026 оны 3-р сарын дундаас 4-р сарын эхэн үе хүртэлх богино хугацаанд дор хаяж зургаан саарал халим үхсэн нь сүүлийн жилүүдэд ажиглагдаж буй таагүй хандлагын үргэлжлэл болоод байна. Саарал халимнууд Мексикийн дулаан уснаас Арктикийн хоол тэжээлээр баялаг бүс рүү нүүдэллэх замдаа Калифорнийн эрэг дагуу дайран өнгөрдөг. Өмнө нь тэд Сан Францискогийн булан руу тэр бүр ордоггүй байсан бол сүүлийн жилүүдэд Арктикт хоол тэжээл багассаны улмаас эрчим хүчээ нөхөхийн тулд тус булан руу орох нь нэмэгджээ.
Сан Францискогийн булан нь ачааны хөлөг онгоц, загас агнуурын болон амралт зугаалгын завь зэрэг хөдөлгөөн ихтэй, идэвхтэй бүс юм. Энэ нь удаан хөдөлгөөнтэй халимнуудын хувьд аюултай “хавх” болон хувирч байна. 2018-2025 оны хооронд хийсэн судалгаагаар булан руу нэвтэрсэн нийт саарал халимны 18 хувь нь тухайн бүс нутагт үхсэн бөгөөд нийт үхлийн 30 хувь нь хөлөг онгоцтой мөргөлдсөний улмаас үүсжээ. 2016 оноос хойш зүүн Номхон далайн саарал халимны популяци хагасаас илүү хувиар буурсан бөгөөд үүнд далайн температур нэмэгдэж, мөсний хэмжээ багассанаас үүдэлтэй хоол тэжээлийн хомсдол голлон нөлөөлж байна. Мөн төллөлт багасаж, популяцийн сэргэх хурд удааширч байгаад эрдэмтэд түгшиж байгаа юм.
Хөлөг онгоцны хурдыг цагт 10 тэнгисийн миль (18.5 км/цаг)-ээс доош бууруулах нь мөргөлдөх эрсдэлийг үлэмж хэмжээгээр багасгадаг байна. NOAA болон Окленд боомтын зүгээс хөлөг онгоцны компаниудад хурдаа бууруулах зөвлөмж өгдөг ч энэ нь одоогоор заавал биелүүлэх журам биш юм. Эрдэмтдийн үзэж буйгаар хөлөг онгоцны жолооч нарт халимнаас зайлсхийх сургалт орох, дулааны камер зэрэг дэвшилтэт технологийг ашиглах нь Сан Францискогийн булан дахь энэхүү эмгэнэлт явдлыг зогсооход чухал ач холбогдолтой юм.
