Counter-Strike 2 (CS2) мэргэжлийн спортын ертөнцийг цочроосон нэгэн мэдээлэл гарсан нь “FaZe Clan” багийн ахлагч, дэлхийн шилдэг тоглогчдын нэг Финн “karrigan” Андерсен шинээр хүч түрэн гарч ирж буй “Falcons” багт нэгдсэн явдал байлаа.
Тоглогчдыг худалдан авахад 100 орчим сая ам.доллар зарцуулаад буй “Falcons” баг karrigan-ийг өөрсдийн эгнээнд нэгтгэснээр CS2-ын зах зээлд томоохон нөлөө үзүүлэхээр зорьж байна. karrigan-ийн хувьд 2021 оноос хойш “FaZe Clan” багтай хамт олон тэмцээнд түрүүлж, амжилт гаргасан туршлагатай нэгэн юм. Түүний энэхүү шилжилт олон нийтийн дунд янз бүрийн таамаглал дагуулж байгаа бөгөөд багийн анд Рассел “Twistzz” Ван Дулкен түүнийг багаас хөөгдөөгүй, харин шилжилт нь туйлын гэнэтийн байсныг онцолжээ.
Сүүлийн үед “FaZe Clan” баг IEM Cologne зэрэг нэр хүндтэй тэмцээнүүдэд амжилт нь урьдынхаас буурсан нь түүнийг ийм шийдвэр гаргахад нөлөөлсөн байх магадлалтай. karrigan өмнө нь өгсөн ярилцлагадаа багийнхаа амжилтад дүгнэлт хийж, “Миний зорилго бол багийг эргүүлэн тэргүүлэх байранд нь аваачих явдал, үүнд би өөрөө оролцох эсэх нь хамаагүй” хэмээн байр сууриа илэрхийлж байсан юм.
“Falcons” багт нэгдсэнээр тэрээр хуучин багийн анд Максим “kyousuke” Лукинтай дахин хамтрах боломжтой болж байна. Шүүмжлэгчдийн үзэж буйгаар одоогоор томоохон цом хүртэж чадаагүй байгаа “Falcons” багийн хувьд karrigan-ийн оролцоо нь шинэ эрин үеийг эхлүүлэх томоохон дэмжлэг болох аж. Харин “FaZe Clan” багийн дараагийн алхам юу байх нь одоогоор тодорхойгүй байна.
