Байгальд ээлтэй, тогтвортой үйлдвэрлэлийн бэлгэ тэмдэг болсон гутал үйлдвэрлэгч Allbirds компани хиймэл оюун ухааны (AI) дэд бүтцийг хөгжүүлэх чиглэлд эрс шилжилт хийж байгаагаа зарлав. Энэхүү стратегийн өөрчлөлтийн хүрээнд тус компани нэрээ NewBird AI болгон өөрчилж, 50 сая ам.долларын хөрөнгө оруулалтыг амжилттай татжээ.
2019 онд тус компанийн үүсгэн байгуулагч, гүйцэтгэх захирал асан Жоуи Звиллингер “Бидний амжилтын гол түлхүүр нь тодорхой мессеж, хэрэглэгчдэд өгөх нэгдмэл ойлголт байсан” хэмээн онцолж, гутлын үйлдвэрлэлийн байгаль орчинд учруулах сөрөг нөлөөг бууруулах зорилгоо танилцуулж байсан юм. Тухайн үед Allbirds нь ашиг олохын зэрэгцээ дэлхий нийтэд эерэг нөлөө үзүүлэх боломжтой нийгмийн хариуцлагатай корпорацын загвар болон байгуулагдсан нь хөрөнгө оруулагчдын анхаарлыг ихэд татаж байв. Гэсэн хэдий ч сүүлийн жилүүдэд компанийн хувьцааны ханш тасралтгүй буурсаар, 2024 онд Жоуи Звиллингер гүйцэтгэх захирлын албан тушаалаасаа огцорсон юм.
Улмаар Allbirds өөрийн үндсэн гутлын бизнесээ American Exchange Group-д худалдсанаар цэвэр AI дэд бүтцийн компани болох замаа заслаа. Тус компанийн удирдлагын баг хувьцаа эзэмшигчдээс байгаль орчныг хамгаалах үндсэн үүргээ албан ёсоор цуцлахыг санал болгоод байна. Энэхүү гэнэтийн бөгөөд зоримог шийдвэр гарсны дараа хөрөнгийн зах зээл маш идэвхтэй хариу үзүүлж, тус компанийн хувьцааны ханш 582%-иар өсжээ. NewBird AI нэртэйгээр үйл ажиллагаагаа үргэлжлүүлэх тус баг одоо технологийн салбарт шинэ түүх бичихээр бэлтгэж байна.
