“Сан-Антонио Спөрс” багийн домогт дасгалжуулагч асан Грегг Попович плей-оффын эхний шатны тоглолтуудын өмнө багийнхаа бэлтгэл дээр зочилж, тоглогчидтой уулзлаа. Хэдийгээр тэрээр эрүүл мэндийн шалтгаанаар дасгалжуулагчийн албаа хүлээлгэн өгсөн ч багийн ерөнхийлөгчийн хувиар үйл ажиллагаанд нь идэвхтэй оролцсон хэвээр байна.
Попович бэлтгэлийн үеэр тоглогчдод хандан үг хэлэхдээ, плей-офф бол улирлын тоглолтуудаас огт өөр “араатан” гэдгийг онцолж, сэтгэл зүйн болон бие бялдрын хувьд шинэ түвшинд бэлтгэлтэй байхыг зөвлөжээ. Багийн холбон тоглогч Де’Аарон Фокс энэ талаар: “Поп бидэнд улирлын амжилтад баяр хүргэхийн зэрэгцээ плей-оффт тоглолтын хэмнэл, эрч хүч хэрхэн өөрчлөгддөг талаар маш хэрэгтэй зөвлөгөө өгсөн” хэмээн ярьсан байна.
77 настай Попович 2024 оны сүүл болон 2025 оны эхээр эрүүл мэндийн хүнд сорилтуудтай нүүр тулж, улмаар дасгалжуулагчийн ажлаасаа албан ёсоор зодог тайлсан билээ. Гэвч түүний биеийн байдал мэдэгдэхүйц сайжирч, долоо хоногт хэд хэдэн удаа “The Rock at La Cantera” бэлтгэлийн төвд ирж, шинэ ахлах дасгалжуулагч Митч Жонсон болон тоглогчидтой санал бодлоо хуваалцсаар байна.
Багийн гүйцэтгэх захирал Ар.Си.Бьюфорд хэлэхдээ, Поповичийн зарим тоглогчидтой байгуулсан холбоо нь зөвхөн сагсан бөмбөгийн талбайгаар хязгаарлагдахгүй, маш гүн гүнзгий бөгөөд энэ нь багийн дотоод уур амьсгалд үнэлж баршгүй хувь нэмэр оруулдаг болохыг онцолсон юм.
Попович тоглогчдод хандан энэ улиралд 62-20 гэсэн өндөр амжилт үзүүлэхэд тусалсан тэрхүү “процесс” буюу өдөр тутмын тууштай байдлаа алдахгүй байхыг уриалжээ. Түүний бэлтгэлийн зааланд харагдах төдий нь л залуу тоглогчдод нэмэлт урам зориг өгч байгааг багийн удирдлагууд хэлж байна.
“Спөрс” баг энэ улиралд амжилттай тоглож, плей-оффт өндөр хүлээлттэй байгаа бөгөөд Попович ард талд нь “El Jefe” буюу “Босс” хэвээр байж, багаа дэмжсээр байна. Түүний туршлага, бодит байдлыг харах чадвар нь багийг аваргын төлөөх өрсөлдөөнд бэлтгэхэд хамгийн том хөшүүрэг болж байна.
