АНУ-ын Сангийн яам Оросын газрын тосны тээвэрлэлтэд ногдуулах хориг арга хэмжээгээ гэнэт сунгах шийдвэр гаргалаа. Энэхүү шийдвэр нь Сангийн сайд Скотт Бессент ийм алхам хийхгүй гэж олон нийтэд мэдэгдсэнээс ердөө хоёр хоногийн дараа гарч байгаагаараа онцлог юм. Бодлогын энэхүү гэнэтийн өөрчлөлт нь Иранд үүссэн мөргөлдөөний улмаас бий болсон эрчим хүчний хомсдолыг зөөлрүүлэх зорилготой байна.
Шинэчилсэн “ерөнхий зөвшөөрөл” нь баасан гарагаас эхлэн танкерт ачигдсан Оросын газрын тосыг АНУ-ын хоригоос 30 хоногийн хугацаанд чөлөөлж байгаа юм. Энэ нь өнгөрсөн гуравдугаар сард гаргасан ижил төстэй хөнгөлөлтийг үргэлжлүүлж буй хэрэг бөгөөд ингэснээр ОХУ-ын эрчим хүчний экспортын орлого нэмэгдэх боломжийг олгож байна. Украины дайнтай холбоотойгоор өмнө нь хязгаарлагдаад байсан Оросын эрчим хүчний орлого Иран дахь мөргөлдөөний нөлөөгөөр ийнхүү сэргэхэд хүрчээ.
Сангийн сайд Скотт Бессент өнгөрөгч лхагва гарагт Цагаан ордонд мэдэгдэхдээ Орос болон Ираны газрын тосны худалдаанд олгосон ерөнхий зөвшөөрлийг сунгахгүй гэдгээ хатуу илэрхийлж байсан юм. Гэвч ийнхүү бодлого гэнэт өөрчлөгдсөн шалтгааны талаар АНУ-ын засаг захиргааны зүгээс одоогоор албан ёсны тайлбар хийгээгүй байна.
