Honor-ийн шинэ бүтээгдэхүүнүүд Европт нээлтээ хийлээ
Honor компани дэлхийн хамгийн нимгэн эвхэгддэг утас болох Magic V5-ийг Европын зах зээлд танилцууллаа. Өнгөрсөн сард Хятадад нээлтээ хийсэн уг загвар одоо Европын хэрэглэгчдэд захиалгаар авах боломжтой болж байна. Үүнтэй зэрэгцэн шинэ MagicPad 3 таблет болон MagicBook Art 14 зөөврийн компьютер худалдаанд гарчээ.
Magic V5 нь 0.1 мм-ээр Oppo Find N5 болон Samsung Galaxy Z Fold 7-оос нимгэн бүтэцтэй. Гэхдээ энэ үзүүлэлт нь зөвхөн цагаан өнгийн хувилбарт хамаарах бөгөөд бусад өнгийн хувилбарууд нь материалын ялгаанаас шалтгаалан өрсөлдөгч утаснуудаас төдийлөн ялгарахгүй. Харин том хэмжээтэй камерын овгорын хувьд Honor-ийн утас илүү зузаан тул, хэрэв энэ үзүүлэлтийг тооцвол Oppo хамгийн нимгэн эвхэгддэг утас хэвээр байна.
Шинэ утасны хамгийн том давуу тал нь батарейд оршдог. 15 хувийн цахиур-нугасны хольцтой шинэ загварын батарей нь уламжлалт батарейгаас илүү зай хэмнэдэг бөгөөд 5,820mAh багтаамжтай. Энэ нь Samsung-ийн 4,400mAh батарейнаас хавьгүй их бөгөөд хэрэглэгчид батарейны хувьд илүү итгэлтэй байж болох юм.
Magic V5 нь Qualcomm Snapdragon 8 Elite чипсетээр ажиллаж, 16GB хүртэл RAM, IP58 / 59 тоос, усны хамгаалалттай. Энэ нь Google Pixel 10 Pro Fold-ийн IP68 үзүүлэлттэй ойролцоо юм. Камерын хувьд 50MP үндсэн болон өргөн өнцгийн линз, 64MP телеобъектив бүхий иж бүрдэлтэй бөгөөд эвхэгддэг утаснуудаас хамгийн шилдэг камерын системтэй гэж үзэж байна. Төхөөрөмжийн үнэ £1,699.99 / €1,999 (ойролцоогоор $2,300 буюу 8 сая төгрөг) байна.
Мөн Honor хоёр шинэ бүтээгдэхүүнийг Европт хамтад нь танилцууллаа. MagicPad 3 нь 13.3 инчийн Android таблет бөгөөд 165Hz давтамжтай LCD дэлгэц, 12,450mAh багтаамжтай батарей, 66W хурдан цэнэглэгчтэй. Энэ нь ердөө 5.8 мм нимгэн бөгөөд Их Британид £599.99 (ойролцоогоор $800 буюу 2.8 сая төгрөг) үнэтэй худалдаанд гарч байна.
Харин MagicBook Art 14 нь Windows үйлдлийн системтэй зөөврийн компьютер бөгөөд магни-титан хольцоор хийсэн 10 мм орчим нимгэн биетэй. 14.6 инчийн OLED дэлгэц нь 3.1K нягтралтай бөгөөд Intel Arc 140T GPU зэрэг чипсетээр тоноглогдсон. Гүйцэтгэлийн хувьд хамгийн хүчирхэг биш ч дизайн болон үзэмжийн хувьд өндөр түвшинд хүрсэн гэж хэлж болно. Үнэ нь £1,499.99 / €1,699 (ойролцоогоор $2,000 буюу 7 сая төгрөг) байна.
Эх сурвалж: The Verge
