ФИБА Германы багийн тоглогч Деннис Шрёдерийг доромжилсон нэгэн хөгжөөн дэмжигчийг бандлаа

Германы багийн ахлагч Деннис Шрёдерийг доромжилсон үзэгчийг ФИБА тэмцээн үзэхийг хориглов

Европын сагсан бөмбөгийн аварга шалгаруулах тэмцээний үеэр Германы багийн ахлагч, Сакраменто Кингсийн хамгаалагч Деннис Шрёдерийг арьс өнгөөр нь доромжилсон үзэгчийг ФИБА хориглолоо. Энэ явдал Финландын Тампере хотод болсон Германы багийн Литвийн багийг 107-88-ийн харьцаатайгаар ялсан тоглолтын үеэр болжээ.

Disgusting: there is no room for racism in this world ⛔️ #EuroBasket

Dennis Schröder experienced an incident with Lithuanian fans: https://t.co/dl5aUxgaGA pic.twitter.com/lMM55HTZEK

— BasketNews (@BasketNews_com) August 30, 2025

ФИБА тухайн үзэгчийг камерын бичлэгээр илрүүлж, хориг тавьсан бөгөөд бичлэгийг орон нутгийн хууль сахиулагчдад шилжүүлсэн гэж мэдэгдэв. Одоогоор орон нутгийн цагдаа нар уг хэргийг шалгаж байна.

Германы сагсан бөмбөгийн холбооны ерөнхийлөгч Инго Вайссын мэдээлснээр, тоглолтын завсарлагааны үеэр Шрёдерийг “сармагчны дуу” гарган доромжилсон байна. Тэрээр “Энэ бол бидний хувьд огт хүлээн зөвшөөрөх зүйл биш. Сагсан бөмбөгийн өнгөлөг, олон талт, нээлттэй ертөнцөд ийм зан авир байж таарахгүй. Бид Деннисийг бүрэн дэмжиж, түүний сэтгэл санааг ойлгож байна. Ийм үйлдэл дахин гарахгүй байхад онцгойлон анхаарч ажиллах болно” хэмээн мэдэгджээ.

ФИБА мөн “Литвийн багийн төлөөлөгчидтэй хамтран ажиллаж, ийм явдал дахин гарахгүй байх тал дээр анхаарна. ФИБА үзэн ядалтын болон ялгаварлан гадуурхах үг хэллэгийг ямар ч хэлбэрээр хүлээн зөвшөөрөхгүй. Тоглогчид, багууд, үзэгчдэд аюулгүй, хүндэтгэлтэй орчин бүрдүүлэх нь бидний спортын үндсэн зорилго” гэж онцолсон байна.

Деннис Шрёдер Германы Брауншвайг хотод төрж өссөн бөгөөд Герман аав, Гамбиан ээжийн хүү юм. Тэрээр өмнө нь Европт, тэр дундаа Герман улсад арьс өнгөөр ялгаварлан гадуурхалтыг мэдэрч байсан тухайгаа ярьж байжээ. “Би цэцэрлэгт явах болгондоо ганцаараа хар арьстай хүүхэд байсан. Хүмүүс миний арьсыг яагаад бохир, эсвэл яагаад өөр байна гэж асуудаг нь үнэхээр хэцүү байсан” гэж Шрёдер Бруклин Нетсийн 2024 оны бичлэгт дурссан байна.

Эх сурвалж: The Athletic / NYTimes