Антонигийн Бетис рүү эргэн ирэлт: Хүнд хэцүү үеийн дараах баяр баясгалан
Өнөө өглөө Реал Бетис клубт эргэн ирсэн Антони нүдэндээ нулимстай сэтгэлээ илэрхийлж, Манчестер Юнайтед клубд байхдаа “Bomb Squad” буюу тусгаарлагдсан тоглогчдын жагсаалтад багтаж байсан хүнд хэцүү өдрүүдийг зөвхөн түүний гэр бүл л үнэхээр ойлгож байсныг хүлээн зөвшөөрөв.
Бразилын жигүүрийн тоглогч өнгөрсөн улиралд Бетист амжилттай зээлээр тоглосны дараа тус клубтэй байнгын гэрээ байгууллаа. Энэ нь түүний Манчестер хотод өнгөрүүлсэн гурван жилийн сорилт дүүрэн аяллыг албан ёсоор дуусгав.
Антони Аяксаас 80 сая фунт стерлингийн үнэтэй ирснээс хойш Юнайтедийн төлөө 96 тоглолтод оролцож, 12 гоол оруулсан. Гэвч сүүлийн саруудад Жадон Санчо, Тайрелл Маласиа, Алехандро Гарначо нарын хамт багийн үндсэн төлөвлөгөөнөөс хасагдаж, тусдаа бэлтгэл хийж байв. Эцэст нь Севиль рүү буцах тохиролцоог гэрээ дуусах өдөр байгуулсан байна.
Хүлээлтийн төгсгөл ба баатарлаг хүлээн авалт
Антонигийн эргэн ирэлт Бетисийн хөгжөөн дэмжигчдийн талархлыг хүлээсэн бөгөөд тэрээр өнөөдөр Гуадалкивир голын эрэг дээр байрлах ресторанд сэтгэгдлээ хуваалцжээ.
Lágrimas de sufrimiento. De felicidad.
— Real Betis Balompié 🌴💚 (@RealBetis) September 2, 2025
Tranquilo. Ya estás en casa 🥹💚 pic.twitter.com/G1Zyf1Mayz
Тэрээр нулимсаа арчиж, “Зөвхөн миний гэр бүл л тэнд байх ямар хэцүү байсныг мэддэг. Тусдаа бэлтгэл хийж байсан ч энэ гайхалтай мөч ирнэ гэдэгт итгэлтэй байсан. Айдас байсаан, гэхдээ итгэл найдвар илүү их байсан” хэмээн хэлжээ.
Тэрээр цааш нь, “Би Бетисийн төлөө хэзээд бүхнээ зориулна. Надтай хайр халамжаар хандсан энэ орчинд мөнгө бол гол зүйл биш. Энэ бол миний анхны сонголт байсан. Одоо би энд, хайртай хотдоо, хайртай клубтээ эргэн ирсэндээ баяртай байна” гэжээ.
Севиль vs Манчестер: Амьдралын ялгаа
Өнгөрсөн үеэ дурсан хошигносон Антони: “Ямар ялгаа вэ! Севиль хот үнэхээр үзэсгэлэнтэй. Манчестерээс илүү. Би 40 гаруй хоног зочид буудалд амьдарсан, энэ үнэхээр хэцүү байсан. Гэхдээ бүгд миний Бетист эргэн ирэхийг хүсэж байсныг мэдэж байсан. Одоо хийх зүйл, зорилго их байна” хэмээв.
Antonio de Triana.
— Real Betis Balompié 🌴💚 (@RealBetis) September 2, 2025
En su barrio.
Con su gente. 😍💚 pic.twitter.com/oxkaJtyA5P
Мэдээлж буйгаар Антони Бетист нэгдэхийн тулд цалингийн бууралт хийсэн бол, клуб түүнийг авахын тулд 22 сая фунт стерлинг төлсөн байна.
Бетисийн ерөнхийлөгчийн мессеж
Бетисийн ерөнхийлөгч Анхель Харо уг наймааг амжилттай хийж чадсан бүх талуудад талархал илэрхийлсэн бөгөөд “Энэ бол олон сарын хүнд хэлэлцээр байсан. Клубын бүхий л түвшний хүмүүс, таны агентууд болон танд [Антони] гүн талархал илэрхийлье. Бидний зам дахин огтлолцоно гэдэгт би үргэлж итгэдэг байсан” гэжээ.
Антони олон улсын завсарлагааны дараа Бетисийн төлөө Ла Лигийн тоглолтод Левантегийн эсрэг гараанд гарч, хоёр дахь дебютээ хийхээр төлөвлөж байна.
Эх сурвалж: 101 Great Goals
