🏀 Леброн Жэймсийн Хятадын аялал: Спортын гүүр
NBA-гийн супер од, Лос Анжелес Лейкерсийн тоглогч Леброн Жэймс 15 дахь удаагаа Хятадад зочилж, Nike брэндийн нэрийн тамирчнаар спортын бүтээгдэхүүнээ сурталчлан аяллаа. Сагсан бөмбөгийн дэлхийн хамгийн том зах зээлүүдийн нэгт тооцогдох Хятадад NBA-ийн одод тоглоом төдийгүй өөрсдийн нэрийн пүүз, брэндийг танилцуулах нь хэвийн үзэгдэл. Жэймс ч энэ уламжлалыг үргэлжлүүлэн, сагсан бөмбөгийн эв нэгдлийн үнэ цэнийг онцолсон нь олны талархлыг хүлээлээ.
Тэрээр “Сагсан бөмбөг бол зүгээр нэг тоглоом биш. Энэ бол хүмүүсийг холбодог гүүр” хэмээн онцолж, спортын соёл хоорондын харилцааг дэмжихэд биечлэн хувь нэмрээ оруулж байгаагаа илэрхийлсэн. Жэймс мөн 2012 онд анх Хятадад зочлох үедээ уулзаж байсан эмэгтэй тоглогч Ню Зивэйтэй дахин уулзсандаа сэтгэл догдолж байгаагаа хуваалцжээ.
Харин түүний нэрээр “People’s Daily” сонинд гарсан нийтлэл АНУ болон Хонг Конгт шүүмжлэл дагуулсан байна. Түүний ойрын хоёр эх сурвалжийн мэдээлснээр, уг нийтлэлийг Жэймс өөрөө бичээгүй бөгөөд аяллын хүрээнд Шанхай, Чэндүд сэтгүүлчидтэй хийсэн бүлгийн ярилцлагын үгсийг Мандарин хэл рүү хөрвүүлж, өөрийнх нь мэдэлгүй нийтэлсэн аж. Түүний хэлсэн зүйлс үнэн боловч ямар нэг хэвлэлд тусгайлан өгсөн ярилцлага байгаагүй гэдгийг онцолжээ.
Энэхүү аялал нь Леброны хувьд 2019 оноос хойших анхны айлчлал юм. Тухайн үед Лэйкерс болон Нетс багууд Шанхай хотод урьдчилсан тоглолт хийхээр очсон ч, Хьюстон Рокетсийн менежер Дэрил Моригийн Хонг Конгийн жагсагчдыг дэмжсэн жиргээ томоохон маргаан үүсгэж, NBA болон Хятадын засгийн газар хоорондын харилцаанд сэв суулгасан билээ. Уг маргааны улмаас Хятадын телевизүүд NBA-ийн тоглолтуудыг цацахаас татгалзаж, лигт олон сая долларын хохирол учирсан тухай комиссар Адам Силвер мэдэгдэж байв.
Өдгөө 40 настай Леброн Жэймс NBA-гийн 23 дахь улирлаа угтах бэлтгэлээ базааж байгаа бөгөөд ирэх 10-р сард Финикс Санс болон Бруклин Нетс багууд Хятадад үзүүлэх тоглолт хийхээр төлөвлөсөн нь Мори-гын маргаанаас хойших анхны NBA тоглолт болж байна.
“Хятадын сагсан бөмбөгийн уур амьсгал намайг үргэлж гайхшруулдаг. Энд ирэх бүртээ гэр бүл маань дулаан хүлээж авдаг. Хятадын найзуудын маань сайхан сэтгэл, урам зориг намайг үргэлж хөдөлгөдөг. Миний хийж чадах хамгийн чухал зүйл бол талбайд бүхнээ зориулж, сэтгэлээсээ талархах явдал юм” хэмээн тэрээр сэтгэлээ илэрхийллээ.
Эх сурвалж: 🔗 The Athletic
