Кавай Леонардын гэрээний асуудалд НБА-гийн комиссар Адам Силвер байр сууриа илэрхийллээ
НЬЮ-ЙОРК – НБА-гийн комиссар Адам Силвер Лос Анжелес Клипперс, эзэн Стив Балмер болон тоглогч Кавай Леонард нарыг хуучин ивээн тэтгэгч Aspiration компанитай холбоотой 48 сая долларын гэрээний асуудлаар шалгаж буйг хүлээн зөвшөөрч, хэрэв нотолгоо илэрвэл лиг зохих арга хэмжээ авна гэдгийг мэдэгдлээ.
Силверийн тайлбарласнаар, хэрэв НБА-гийн дүрэм зөрчигдсөн нь нотлогдвол Клипперс, Балмер болон Леонардын эсрэг хатуу шийтгэл ногдуулах эрх нь лигт байгаа ч, нотолгоо хангалтгүй тохиолдолд ямар ч шийдвэр гаргахгүй байж болохыг онцоллоо.
“Бүрэн хэмжээний шалгалтын зорилго нь үнэхээр дүрэм зөрчсөн эсэхийг тогтоох явдал юм. Бид ил тод байдалтай, олон нийтийн анхааралд байдаг спорт учраас заримдаа хүмүүс гүйцэд мэдээлэлгүйгээр буруу дүгнэлт гаргадаг. Би өөрийгөө Кавай, Балмер нарын оронд тавьж, тухайн нөхцөл байдалд шударга хандана гэж найдаж байна. Эцэст нь бид шүүх байгууллага биш” хэмээн Силвер мэдэгджээ.
Түүний хэлснээр, энэ асуудлаар нотлох үүрэг нь НБА-д байгаа бөгөөд хэрвээ хангалттай баримт нотолгоо гарч ирэхгүй бол ямар нэг шийтгэл ногдуулахгүй гэв.
Силвер одоогоор уг асуудлыг албан ёсоор шалгахыг зөвшөөрсөн ч шалгалт дуустал бусад багийн эзэдтэй энэ талаар хэлэлцэхээс татгалзаж буйгаа илэрхийллээ. “Би НБА-д олон жил ажилласан. Үүний хугацаанд олон янзын гомдол, таамаг, буруутгалууд гарч байсан. Харин би үргэлж шударга байдлыг эрхэмлэж ирсэн. Тиймээс баримттай шалгалт дуусахыг хүлээх нь зүйтэй” гэжээ.
BREAKING: Adam Silver speaks on the Clippers investigation
— APHoops (@APH00PS) September 10, 2025
"The burden [of proof] is on the league if we're going to discipline a team, owner or player … As a matter of fundamental fairness I would be reluctant to act if there was only an appearance of impropriety … The… pic.twitter.com/jBUYvAl7by
Европ дахь НБА-гийн ирээдүйн төлөвлөгөө
Силвер НБА-гийн багийн тоог 32 болгон өргөтгөх талаар хэлэлцэж байгааг дурдсан ч, энэ талаар одоогоор шинэ мэдээлэл өгөх боломжгүй гэлээ. Харин Европын зах зээлд зориулсан тусдаа сагсан бөмбөгийн лиг байгуулах санаа илүү анхаарал татаж байгаа аж.
НБА-гийн удирдлагууд Европт орон нутгийн багийн эзэд болон клубүүдтэй уулзалт хийж эхэлсэн байна. Гэсэн ч энэ санаачилга нь НБА-гийн албан ёсны өргөжилттэй адил хэмжээний ач холбогдолтой биш гэдгийг онцоллоо.
Багуудын сүүлийн үеийн үнэлгээ огцом өссөн нь НБА-гийн өргөжилтийг хойшлуулах нэг хүчин зүйл болжээ. Тухайлбал, Лос Анжелес Лэйкерс 10 тэрбум доллар, Бостон Сэлтикс 6.1 тэрбум долларын үнэлгээтэй болсон нь шинэ багуудад ямар үнэлгээ тогтоох вэ гэдэг дээр тодорхойгүй байдал үүсгэсэн байна.
“Энэ бол сайн талтай, гэхдээ бодит бэрхшээл дагуулж буй өндөр зэрэглэлийн асуудал юм” хэмээн Силвер нэмж хэлжээ.
Эх сурвалж: The Athletic – NY Times
