Барселона клуб ирэх сарын Эл Класико тоглолтод Реал Мадридын эсрэг гарахдаа алдарт дуучин Эд Шираны нэр эсвэл түүний шинэ цомгийн логотой тусгай өмсгөл өмсөхөөр болжээ. Энэ нь клубын Spotify-той хийсэн соёлын хамтын ажиллагааны хүрээнд хэрэгжиж буй ээлжит бүтээлч санаачилга юм.
Spotify компани Камп Ноу цэнгэлдэх хүрээлэнгийн нэрийн эрхийг эзэмшдэг бөгөөд өмнө нь Барселонагийн хамгийн чухал тоглолтуудад зориулж ивээн тэтгэгчийн логог солих уламжлалыг эхлүүлсэн. Тэд өмнө нь Дрэйк, Rosalía, The Rolling Stones, Karol G, Coldplay, Travis Scott зэрэг уран бүтээлчдийн нэрийг өмсгөл дээр байршуулж байсан бол энэ удаа тэр жагсаалтад Эд Ширан нэгдэж байна.
Каталоны RAC1 мэдээлснээр, аравдугаар сарын 26-нд Сантьяго Бернабеу цэнгэлдэхэд болох Эл Класико тоглолтод Барселонагийн өмсгөл дээр Эд Шираны нэр эсвэл түүний есдүгээр сарын 12-нд танилцуулсан “Play” цомгийн логог хэвлэх хувилбаруудыг авч хэлэлцэж байгаа аж. Өмсгөлийн цуглуулгын түүх судлаач @memorabilia1899 ч үүнийг баталсан байна.
•These are two different logos for Ed Sheeran that might be used for the next El Clásico on October 26th pic.twitter.com/dWghiuBwVa
— memorabilia1899.co (@memorabilia1899) September 16, 2025
Өмнөх хамтын ажиллагаануудын нэгэн адил, энэ удаагийн тусгай өмсгөлтэй холбоотой streetwear цуглуулга худалдаанд гарах боломжтой бөгөөд орлогын тодорхой хэсгийг буяны үйлст зориулж болох ч албан ёсоор батлагдаагүй байна.
Эд Ширан 2017 онд “Barcelona” нэртэй дуу гаргаж байсан бол “Play” цомог нь шүүмжлэгчдээс хүлээн авсан үнэлгээ харилцан адилгүй байгаа билээ. Харин Ханси Фликийн удирдсан Барселона тусгай өмсгөлтэйгөөр Реал Мадридыг хожвол, Каталоны хөгжөөн дэмжигчид “дууг нь хамтдаа дуулж” баяраа тэмдэглэх нь лавтай.
