OpenAI шинэ хөгжүүлэлтийн хэрэгслүүдээ танилцууллаа
OpenAI компани Сан Франциско хотод жил бүр зохион байгуулдаг DevDay 2025 арга хэмжээний үеэр хөгжүүлэгчдэд зориулсан шинэ хэрэгслүүдээ танилцууллаа. ChatGPT-ийн долоо хоног тутмын идэвхтэй хэрэглэгчдийн тоо 800 саяас давсан талаар мэдээлсэн тус компани энэ удаа хөгжүүлэгчдэд зориулсан шинэ шатны боломжуудыг нээжээ.
Шинэчлэлүүдийн гол зорилго нь ChatGPT-г бүрэн хэмжээний хөгжүүлэлтийн платформ болгон өргөжүүлэхэд оршиж байна. Үүнд Apps SDK (Software Development Kit) болон AgentKit API хэмээх хоёр үндсэн хэрэгсэл багтжээ.
Apps SDK: ChatGPT-д шууд апп бүтээх шинэ эрин
OpenAI-ийн танилцуулсан Apps SDK нь ChatGPT дотор гуравдагч талын аппликейшнүүдийг ашиглан даалгавар гүйцэтгэх, харилцан ажиллах боломжийг олгоно. Жишээлбэл, OpenAI нь Zillow компанитай хамтран Питтсбург хотын үл хөдлөх хөрөнгийн газрын зургийг ChatGPT дээр үүсгэж, хэрэглэгчдэд газрын зураг дээр үндэслэн асуулт тавих боломжийг харуулжээ.
Энэ SDK нь хөгжүүлэгчдэд гуравдагч талын аппликейшнүүдийг ChatGPT-д холбож, хэрэглэгчдэд зориулсан интерактив шийдэл бүтээх өргөн боломж нээж байна. OpenAI-ийн мэдээлснээр, Apps SDK нь Free, Go, Plus, Pro зэрэг бүх төлөвлөгөөнд ашиглах боломжтой бөгөөд Booking.com, Canva, Coursera, Figma, Expedia, Spotify, Zillow зэрэг аппуудыг дэмжих болно. Мөн удахгүй DoorDash, OpenTable, Target, Uber зэрэг аппликейшнүүд нэмэгдэх аж.
Одоогоор хэрэглэгчид SDK-г туршилтын хэлбэрээр ашиглах боломжтой байгаа ч, энэ оны сүүлчээр хөгжүүлэгчид өөрсдийн аппуудыг ChatGPT-д байршуулж эхлэхээр төлөвлөж байна.
AgentKit API: Хиймэл оюун ухааны агент бүтээх хэрэгсэл
Apps SDK-ээс гадна OpenAI компани AgentKit API-г танилцуулсан бөгөөд энэ нь хэрэглэгчдэд өөрийн хиймэл оюун ухааны агентуудыг бүтээх, удирдах боломжийг олгоно. Энэ нь өмнө нь танилцуулсан Agent системийн өргөтгөл бөгөөд агентууд хэрэглэгчийн даалгаврыг биелүүлэхийн тулд вебийг бие даан ашиглаж чадна.
AgentKit-ийн гол онцлог болох Agent Builder нь визуал интерфэйс ашиглан код бичихгүйгээр агент бүтээх боломжийг олгож байгаа бөгөөд Сэм Олтманы хэлснээр “агент бүтээх үйл явцыг Canva шиг хялбар болгож чадсан” байна.
Насны баталгаажуулалт ба “Насанд хүрэгчдийн туршлага”
OpenAI мөн насны баталгаажуулалтын шинэ системийг танилцуулсан бөгөөд энэ нь насанд хүрээгүй хэрэглэгчдэд зориулсан илүү хатуу хяналт бүхий ChatGPT туршлагыг бий болгох зорилготой. Энэхүү шинэчлэл нь нэгэн өсвөр насны хүүхдийн гэр бүлээс гаргасан нэхэмжлэлийн дараа хийгдсэн гэжээ.
Түүнчлэн, компанийн төлөвлөгөөнд “насанд хүрэгчдэд (18+) зориулсан туршлагууд” ч багтсан байна. Энэ нь хэрэглэгчийн насыг баталгаажуулсны дараа нээгдэх бөгөөд илүү өргөн хүрээний хэрэглээ, контентын төрөл нээгдэх төлөвтэй байна.
Эх сурвалж: Gizmodo
