Өнгөрсөн арваннэгдүгээр сард Брайан Норман Жуниорыг буулган авч, WBO холбооны хагас хүнд жингийн дэлхийн аварга болсон Девин Хэйнигийн дараагийн тулаан цуцлагдлаа. Тухайн тулаанд тэрээр өрсөлдөгчөө нокдаунд оруулж, шүүгчдийн санал нэгтэй шийдвэрээр ялалт байгуулж байсан билээ.
Боксын хамгийн сонирхолтой жингийн нэгд тооцогддог энэ ангилалд Хэйни бүсүүдээ нэгтгэхийн тулд WBC холбооны аварга Райан Гарсиа, WBA-гийн аварга Роландо Ромеро эсвэл IBF-ийн бүсийг эзэмшигч Льюис Крокер нартай тулалдах боломжтой байв.
Хамгийн их хүлээлт үүсгэж байсан Райан Гарсиатай хийх дахин тулаан (rematch) одоогоор боломжгүй болоод байна. Учир нь тэдний 2023 онд хийсэн тулааны дараа Гарсиа допингийн шинжилгээнд бүдэрч, тулааны үр дүн хүчингүй болсон юм. Мөн Гарсиа саяхан Теофимо Лопестэй тулалдах бэлтгэлдээ орсноо зарласан байна.
Улмаар Хэйни WBA холбооны аварга “Ролли” Ромеротой бүс нэгтгэх тулааны хэлэлцээ хийж эхэлсэн ч эцсийн тохиролцоонд хүрэлгүй цуцлагдсан нь энэ долоо хоногт тодорхой болов. Ромеро өөрийн цахим хуудсаараа дамжуулан үүний шалтгааныг тайлбарлахдаа Хэйнийг тулалдахаас айж байна хэмээн буруутгажээ.
Ромеро: “Би Девин Хэйнитэй тулалдахын тулд чадлаараа хичээсэн. Ашиг орлогын 50 хувийг санал болгосон ч түүнд хангалтгүй байсан бололтой. Энэ бол Amazon Prime-аар гарах томоохон PPV тулаан байх байлаа. Девин өөрийгөө сурталчилж чаддаггүй тул бүх маркетингийг би өөрөө хариуцахад бэлэн байсан. Тэр надаас айж байгаа нь үнэхээр гайхалтай” гэж мэдэгдсэн байна.
Үүний хариуд Девин Хэйни тулаан цуцлагдсан шалтгаан нь санхүүгийн баталгаатай холбоотой гэдгийг тайлбарлав. Тэрээр “Гэрээнд санхүүгийн ямар нэгэн баталгаа байгаагүй. Миний хувьд ‘том мөнгө’ гэдэг нь Ромерогийн төсөөлж байгаа шиг бага дүн биш. Тиймээс 50/50 хуваалтыг хүлээн авах боломжгүй байсан” хэмээн хариу мэдэгдэл хийжээ.
Одоогийн байдлаар хоёр боксчин хоёулаа дараагийн өрсөлдөгчөө хайж, тус тусын бэлтгэлдээ ороод байна. Тэдний хоорондын энэхүү маргаан нь бокс сонирхогчдын дунд хэн нь жинхэнэ аварга вэ гэдэг асуултыг дахин хөндөж эхэллээ.
