Сүүлийн үед TikTok платформ дээр хиймэл оюун ухаан (AI) ашиглан бүтээсэн “жимсний драм” хэмээх хачирхалтай контентууд тренд болж, сая сая хэрэглэгчдийн анхаарлыг татаж байна. “Fruit Love Island”, “The Summer I Turned Fruity”, “The Fruitpire Diaries” зэрэг нэршилтэй эдгээр бичлэгүүд нь бодит хүмүүсийн оролцоогүйгээр, зөвхөн AI-аар үүсгэсэн жимсний дүрүүд болон зохиолоор бүтээгддэгээрээ онцлог юм.
Эдгээр богино хэмжээний “микродрама” кинонууд нь үзэгчдийн анхаарлыг маш хурдан татаж, виртуал ертөнцөд хүчээ авч байна. Хэдийгээр эдгээр аккаунтууд нь шинээр үүссэн учраас TikTok-ийн бүтээгчдийн сан (Creator Fund)-аас одоогоор орлого олж амжаагүй байгаа ч, хэдэн сая үзэлт бүхий видео тус бүрээс мянга мянган доллар олох боломжтойг шинжээчид онцолжээ.
Гэвч энэхүү трендийн цаана шүүмжлэл дагуулсан асуудлууд ч бий. Зарим уран бүтээлчид болон жүжигчдийн үзэж буйгаар, эдгээр AI контентууд нь анхаарал татахын тулд эмэгтэйчүүдийн эсрэг хүчирхийллийг далд хэлбэрээр харуулсан өгүүлэмж, хэт хурц гарчиг ашигладаг байна. Түүнчлэн AI технологи нь видео бүтээх зардал болон хүн хүчийг эрс багасгаж байгаа нь бодит жүжигчдийн ажлын байранд сөргөөр нөлөөлөх эрсдэлтэйг анхааруулж байна.
Орчин үеийн хэрэглэгчдийн анхаарал төвлөрүүлэх хугацаа богиносож, хурдтай, цэгцтэй контент хүсэх болсон нь AI-аар бүтээгдсэн эдгээр цувралууд амжилт олох гол хөшүүрэг болж байна. Энэхүү үзэгдэл нь TikTok платформын алгоритм болон контент бүтээх хандлага хэрхэн хувьсан өөрчлөгдөж байгаагийн тод жишээ юм.
