АНУ-ын Ерөнхийлөгч Дональд Трампын засаг захиргаанаас 2027 оны төсвийн төслийг танилцуулсан нь NASA болон бусад шинжлэх ухааны байгууллагуудын ирээдүйд томоохон цохилт болж болзошгүйг ажиглагчид анхааруулж байна. Шинэ төсөлд NASA-гийн нийт санхүүжилтийг өмнөх жилээс 23 хувиар бууруулахаар тусгажээ.
Ялангуяа шинжлэх ухааны салбарт хуваарилах хөрөнгийг 7.25 тэрбум ам. доллараас 3.9 тэрбум ам. доллар болгон бууруулах санал гаргасан нь тус салбарын төсвийг бараг 47 хувиар танаж буй хэрэг юм. Хэдийгээр сарны суурь болон дэд бүтцийг хөгжүүлэх Артемис хөтөлбөрт нэг тэрбум гаруй ам. долларын нэмэлт хөрөнгө оруулалт тусгасан ч шинжлэх ухаан, технологийн бусад чухал төслүүд зогсох эрсдэлд орлоо.
Төсвийн төсөлд NASA-гийн 40 гаруй эрчим хүчний төслийг зогсоохоор заасан бөгөөд сансрын тогтвортой байдлыг хангах зарим хөтөлбөрүүдийг “дэмий зардал” хэмээн үзэж татан буулгахаар төлөвлөжээ. Мөн Ангараг гарагаас дээж буцаах (Mars Sample Return) өндөр өртөгтэй төслийг дахин цуцлахаар тусгасан байна.
Шинжлэх ухааны олон нийтийн байгууллага болох The Planetary Society-ийн мэдэгдсэнээр, ийм хэмжээний таналт нь АНУ-ын сансрын салбарын манлайлал, инновацын хөгжилд сөргөөр нөлөөлж, олон мянган ажилтны хувь заяаг эргэлзээтэй болгож байна. Түүнчлэн цөөнхийн их сургуулиудтай хамтран хэрэгжүүлдэг төслүүд болон хөгжиж буй орнуудад байгалийн гамшгаас урьдчилан сэргийлэхэд тусалдаг SERVIR хөтөлбөрийн санхүүжилтийг зогсоохоор санал болгосон нь шүүмжлэл дагуулж байна.
Зөвхөн NASA төдийгүй Үндэсний эрүүл мэндийн хүрээлэн (NIH), Үндэсний шинжлэх ухааны сан (NSF), Байгаль орчныг хамгаалах агентлаг (EPA) зэрэг холбооны шинжлэх ухааны гол байгууллагуудын төсөв ч мөн ижил замаар танагдах төлөвтэй байна. Төсвийн эцсийн шийдвэрийг Конгресс гаргах бөгөөд хууль тогтоогчдын дунд энэ асуудлаар ширүүн маргаан өрнөх нь тодорхой байна.
