АНУ-ын Дэд ерөнхийлөгч Ж.Д.Вэнс өнгөрсөн амралтын өдрүүдэд гадаад бодлогын хэд хэдэн томоохон бүтэлгүйтэлтэй нүүр тулснаар олон нийт болон улс төр судлаачдын шүүмжлэлийн бай болоод байна. Ирантай хийсэн энхийн хэлэлцээ мухардалд орж, Унгарт түүний дэмжиж байсан тал ялагдал хүлээсэн нь түүнийг “түүхэн бүтэлгүйтлийн цуврал” эхлүүллээ хэмээн егөөдөхөд хүргэв.
Пакистаны Исламабад хотноо 21 цагийн турш үргэлжилсэн АНУ, Ираны хэлэлцээ ямар ч үр дүнгүй өндөрлөлөө. Дэд ерөнхийлөгч Ж.Д.Вэнс Ираны талыг цөмийн зэвсэг хөгжүүлэх амбицаасаа татгалзана гэдэгт итгэхгүй байгаагаа илэрхийлсэн бол Ираны тал Ормузын хоолойн хяналт болон цөмийн хөтөлбөрийн асуудлаар тохиролцоонд хүрч чадаагүйг онцолсон юм. Хэлэлцээ бүтэлгүйтсэний дараа Ерөнхийлөгч Дональд Трамп Усан замын цэргийн хүчинд Ормузын хоолойг бүслэх тушаал өгсөн нь бүс нутгийн нөхцөл байдлыг улам хурцатгав.
Үүнтэй зэрэгцэн Унгар улсад болсон сонгуулиар Ерөнхийлөгч Виктор Орбан ялагдал хүлээсэн нь Ж.Д.Вэнсийн хувьд хүнд цохилт боллоо. Вэнс сонгуулиас хэдхэн хоногийн өмнө Унгарт биеэр очиж Орбаныг дэмжиж байгаагаа илэрхийлж байсан юм. Олон нийтийн сүлжээгээр түүнийг очиж дэмжсэн тал бүр нь ялагдаж байгааг “хар мөртэй” дипломат ажиллагаа хэмээн шүүмжилж байна.
Ж.Д.Вэнс өмнө нь хоёрдугаар сарын 28-нд эхэлсэн “Operation Epic Fury” ажиллагааны эсрэг байр суурьтай байсан ч сүүлийн үед Ерөнхийлөгч Трампын шийдвэрүүдийг бүрэн дэмжиж байгаа билээ. Гэвч энэхүү амралтын өдрүүдийн үйл явдал түүний олон улсын тавцан дахь нөлөө болон стратегийн тооцоололд эргэлзээ төрүүлж эхэллээ.
