Гурван улирал үргэлжилсэн “Чакки” цуврал өндөрлөсөн ч франчайзын бүтээлч Дон Манчини аймшигт хүүхэлдэйн түүхийг бүрэн хэмжээний кино болгон үргэлжлүүлэхээр ажиллаж байна. Энэхүү шинэ төсөл нь 2019 оны шинэчлэлтийг бус, харин арваад жил үргэлжилсэн үндсэн түүхийг үргэлжлүүлэх ажээ.
Дон Манчини энэ удаагийн ангийг 2013 оны “Чаккигийн гамшиг” (Curse of Chucky) болон анхны хоёр анги шиг илүү аймшигтай, жихүүдэс төрүүлэхүйц өнгө аястай хийхээр зорьж байна. Сүүлийн жилүүдэд цуврал нь хошин шог, егөөдөл тал руугаа түлхүү хандаж байсан бол шинэ кино нь эргээд сонгодог аймшгийн хэлбэртээ орох төлөвтэй байна.
Уг шинэ киноны нэг онцлох зүйл нь театрт нээлтээ хийх явдал юм. Өмнөх “Чаккигийн гамшиг” болон “Чаккигийн шүтээн” (Cult of Chucky) зэрэг кинонууд зөвхөн зарим улсад театрт гарч, ихэвчлэн шууд видео хэлбэрээр (VOD/DVD) худалдаанд гарч байсан билээ. Харин 2004 оны “Чаккигийн үр” (Seed of Chucky) киноноос хойш ийнхүү үндсэн түүх дахин том дэлгэцнээ гарахаар бэлтгэгдэж байна.
“Хүүхэлдэй Чакки 8” киноны талаарх нэмэлт мэдээлэл, нээлтийн тов болон жүжигчдийн бүрэлдэхүүн тодорхой болох тусам бид цаг алдалгүй хүргэх болно.
