“Ливерпүүл” клубийн ерөнхий дасгалжуулагч Арне Слот Аваргуудын лигийн шөвгийн наймын хариу тоглолтод “Пари Сен-Жермен”-ийг буулган авч, дараагийн шатанд шалгарах бүрэн боломжтой гэдэгт итгэлтэй байгаагаа илэрхийллээ. Эхний тоглолтод “ПСЖ” 74 хувьтай бөмбөг эзэмшиж, 2:0-ээр хожсон ч Слот боломж хараахан алдагдаагүй гэж үзэж байна.
Тэрээр “Манчестер Сити”-гийн эсрэг хийсэн FA цомын тоглолтын нөхцөл байдлыг жишээ болгон дурдлаа. “Этихад цэнгэлдэх хүрээлэнд эхний 35 минутын дараа биднийг 4:0-ээр хожигдоно гэж хэн ч санаагүй байх” хэмээн Слот хэлээд, хөлбөмбөгт тоглолтын хувь заяа хурдан өөрчлөгддөг болохыг сануулав. Мөн тэрээр “Сити”-гийн бусад тоглолтууд болон “Галатасарай”-тай хийсэн тоглолтын нөхцөл байдлыг дурдаж, баг нь Парист үзүүлснээс хамаагүй илүү тоглолт гаргах чадвартайг онцолсон юм.
Арне Слотын хэлснээр “ПСЖ”-ийг дарамтлах нь амаргүй ч боломжгүй зүйл биш аж. Тэрээр багийнхаа довтолгооны хэв маягийг өөрчлөхгүй бөгөөд эхнээс нь түрэмгий тоглож, эхний гоолыг оруулахыг гол зорилтоо болгож байна. Өрсөлдөгч багийн хурд, ур чадварыг үнэлж байгаа ч “Анфилд” цэнгэлдэх хүрээлэнгийн уур амьсгал, хөгжөөн дэмжигчдийн дэмжлэг тоглолтын хувь заяаг шийдэх гол хүчин зүйл болно гэж тэрээр найдаж байна.
“Ливерпүүл” клуб өмнө нь Аваргуудын лигт хүнд байдлаас гарч, гайхалтай эргэн ирэлтүүдийг хийж байсан түүхтэй:
- 2025/26: 1/8 шигшээд “Галатасарай”-д 1:0-ээр хожигдсон ч 4:1-ээр хариугаа авсан.
- 2018/19: Хагас шигшээд “Барселона”-д 3:0-ээр хожигдсон ч 4:0-ээр (нийлбэр 4:3) хожсон.
- 2015/16: Шөвгийн наймд “Дортмунд”-д 3:1-ээр хожигдож яваад 5:4-өөр ялалт байгуулсан.
- 2004/05: Шигшээ тоглолтод “Милан”-д 3:0-ээр хожигдож байгаад тэнцүүлж, торгуулийн цохилтоор түрүүлсэн.
Энэхүү баялаг түүх болон дасгалжуулагчийн тактикийн өөрчлөлт нь “Ливерпүүл”-ийг “ПСЖ”-ийн эсрэг дахин нэгэн түүхэн эргэн ирэлт хийхэд хөтөлнө гэсэн хүлээлтийг фэнүүдийнх нь дунд үүсгээд байна.
