Жэймс Вэбб сансрын телескоп Бархасбадь гарагаас 15 дахин их жинтэй, Дэлхийгээс 150 дахин их хүнд элемент агуулсан 29 Cygni b хэмээх биетийн гарал үүслийг нарийвчлан тогтоожээ. Одод нь асар том хий, тоосны үүлнээс бие даан үүсдэг бол гарагууд залуу одны эргэн тойрон дахь үлдэгдэл хий, тоосноос бүрэлддэг байна. 29 Cygni b-ийн хувьд энэхүү хоёр процессын яг зааг дээр оршиж байсан нь одон орон судлаачдын дунд удаан хугацааны турш эргэлзээ төрүүлээд байсан юм.
Уг биетийн нууцыг тайлахын тулд Жонс Хопкинс их сургуулийн эрдэмтэд Жэймс Вэбб телескопын ойрын хэт улаан туяаны камерыг ашиглан шууд зураг авч, нарийвчилсан судалгаа хийжээ. 29 Cygni b нь өөрийн одоос дунджаар 2.4 тэрбум км зайд оршдог бөгөөд энэ нь манай нарны аймгийн Уран гарагийн тойрдог зайтай ойролцоо юм. Судлаачид уг биетийн агаар мандал дахь нүүрстөрөгчийн давхар исэл болон нүүрстөрөгчийн дутуу ислийн агууламжийг тодорхойлохын тулд гэрэл шингээлтийн спектрийг шинжилсэн байна.
Шинжилгээний үр дүнд 29 Cygni b нь өөрийн эх одтой харьцуулахад хүнд элементээр харьцангуй баялаг болох нь тогтоогджээ. Энэ нь тухайн биет үүсэх явцдаа гараг үүсэх дискийн үлдэгдэл хүнд элементүүдийг их хэмжээгээр өөртөө нэгтгэснийг илтгэж байгаа юм. Шинжлэх ухааны эдгээр нотолгоонд үндэслэн эрдэмтэд 29 Cygni b-ийг од биш, харин гараг үүсэх замаар хөгжсөн асар том хэмжээтэй гараг болохыг албан ёсоор баталлаа. Энэхүү нээлт нь сансар огторгуйд гараг болон одод үүсэж бүрэлдэх ялгаатай аргуудыг илүү тодорхой ойлгоход чухал ач холбогдолтой юм.
