“Шарлотт Хорнетс” багийн тоглогч ЛаМело Болл “Майами Хит”-ийн төвийн тоглогч Бам Адебайотой тоглолтын үеэр болсон таагүй явдлын дараа уучлалт гуйхыг хичээсэн ч амжилтгүй болсон байна.
Тоглолтын үеэр ЛаМело Болл Бам Адебайог пүүзнээс нь зуурч унагаасны улмаас Адебайо шидэлт хийх боломжоо алдаж, улмаар бэртэл авсан юм. Үүний дараа Болл Адебайогийн биеийн байдалд санаа зовж, уучлалт гуйхаар хувцас солих өрөөний гадна хүлээсэн боловч Адебайог усанд орж байсан тул уулзаж чадаагүй ажээ. Болл энэ талаар тайлбарлахдаа, Адебайог бэртэлгүй байгаа эсэхийг мэдэх нь түүний хувьд чухал байсан гэдгийг онцолсон байна.
Харин Бам Адебайогийн зүгээс Болл түүнтэй биечлэн холбогдож уучлалт гуйгаагүй гэдгийг хэлэв. Тэрээр тоглолтын дараа усанд орж байсан тул ярилцах боломжгүй байснаа дурдаад, цаашид Боллтой уулзахдаа энэ асуудлын талаар ярилцаж, нэг мөр шийдвэрлэнэ гэдгээ илэрхийлжээ.
Тус хэргийн улмаас шүүгчид ЛаМело Боллыг “Flagrant 2” алдаагаар торгосон юм. Болл хэвлэлийнхэнд өгсөн ярилцлагадаа: “Энэ бүхэн бол сагсан бөмбөгийн тоглолтын л нэг хэсэг. Би Бамтай хэзээ ч муу харилцаатай байж байгаагүй” хэмээн хариулсан байна.
