Одоо татан буугдаж буй стартапууд өөрсдийн компанийн харилцаа холбооны мэдээлэл, тэр дундаа цахим шуудан, Slack мессеж зэрэг асар их өгөгдлөө хиймэл оюун ухааны (AI) загваруудыг сургах зорилгоор хэдэн арван мянган доллараар зарж эхэлжээ.
“Forbes” сэтгүүлийн мэдээлснээр, стартапыг татан буулах үйл ажиллагаа эрхэлдэг компаниуд үүсгэн байгуулагчдад компанийн өгөгдлийг борлуулах замаар эцсийн мөнгөн хөрөнгөө босгох боломжийг олгож байна. Анх том хэлний загварууд (LLM) интернет дээрх нийтлэг мэдээллээр сургагддаг байсан бол одоогийн хиймэл оюун ухааны агентууд ажлын бодит байдлыг илүү нарийвчлан харуулсан, нарийн төвөгтэй өгөгдлийн багцуудыг шаардах болжээ.
Эдгээр өгөгдлийг “Reinforcement Learning Gyms” (RL gyms) хэмээх орчинд ашигладаг бөгөөд энд AI агентууд ажлын байран дахь төрөл бүрийн даалгавруудыг гүйцэтгэх чадвараа сайжруулдаг байна. Өнгөрсөн жил “The Information” сэтгүүлд мэдээлснээр Anthropic болон OpenAI компаниуд ийм төрлийн сургалтын орчинд нэг тэрбум доллар хүртэл зарцуулах талаар хэлэлцэж байжээ.
Одоогийн байдлаар цалин хөлс, татвар, хөрөнгө оруулагчдын зохицуулалт зэрэг асуудлыг хариуцдаг компаниуд энэ зах зээлд идэвхтэй оролцож байна. Тухайлбал, “SimpleClosure” компани нь өөрийн “Asset Hub” бүтээгдэхүүнээр дамжуулан стартапуудад өгөгдлөө мөнгөжүүлэхэд нь тусалдаг. Энэхүү платформ нь эх код, баримт бичиг, ажлын урсгал, Slack мессеж болон цахим шуудан зэрэг ажлын байрны өгөгдлийг лицензээр олгох нөхцөлийг бүрдүүлдэг байна.
“SimpleClosure”-ийн мэдээлснээр, өнгөрсөн жил тэдний компаниар дамжин 100 орчим гэрээ хийгдсэн бөгөөд гэрээ бүр 10,000-аас 100,000 долларын үнэтэй байжээ. Гэсэн хэдий ч зарим хуульч, шинжээчдийн зүгээс энэ нь ажилчдын хувийн мэдээллийн аюулгүй байдалд эрсдэл учруулж болзошгүй хэмээн санаа зовж байна. AI болон Дижитал Бодлогын Төвийн үүсгэн байгуулагч Марк Ротенберг хэлэхдээ: “Ажилчдын хувийн мэдээллийн нууцлал нь туйлын чухал асуудал юм. Хүмүүс Slack зэрэг харилцааны хэрэгслээс өндөр хамааралтай болсон энэ үед энэ нь зүгээр нэг мэдээлэл биш, харин тодорхой хүмүүсийн амьдралтай холбоотой өгөгдөл юм” хэмээн анхааруулжээ.
