Anthropic компани энгийн үгэн тушаалаар вэбсайтын загвар, аппликейшны прототип болон маркетингийн материалуудыг өндөр чанартайгаар бүтээх чадвартай “Claude Design” хэмээх шинэ хиймэл оюун ухааны хэрэгслээ танилцууллаа. Claude Opus 4.7 технологид суурилсан уг хэрэгсэл нь Claude Pro, Max, Team болон Enterprise багцын хэрэглэгчдэд ашиглалтад орж эхлээд байна.
Хэрэглэгчид хүссэн загвараа энгийн хэлээр тайлбарлаж бичихэд Claude Design түүнийг нь шуурхай үүсгэх бөгөөд бэлэн код болон загварын файлуудыг уншуулах боломжтой. Ингэснээр тухайн багийн өнгө төрх, хэлбэр дүрс болон бусад элементүүдийг автоматаар нэгтгэсэн загварын системийг бүрдүүлж чаддаг. Үүссэн загварыг хэлэлцүүлэг өрнүүлэх, шууд засварлах эсвэл Claude-ын тусгай хэрэгслүүдээр дамжуулан улам сайжруулах боломжтой юм.
Бүтээгдсэн загваруудыг PDF, PowerPoint хэлбэрээр экспортлох эсвэл Canva руу шууд шилжүүлэх боломжтой бөгөөд дууссан загварыг “Claude Code”-д оруулж, ажиллагаатай бодит төсөл болгон хувиргаж болно. Anthropic компанийн зүгээс уг хэрэгслийг мэргэжлийн дизайнеруудад санаагаа хурдан боловсруулахад, харин дизайны мэдлэггүй удирдлагуудад өөрсдийн санаагаа бодит ажил болгоход тусална гэж үзэж байна.
Энэхүү мэдээлэл цацагдсаны дараа UI/UX дизайны зах зээлийн 80-90 хувийг эзэлдэг “Figma” компанийн хувьцаа 7 хувиар унасан нь салбарынхны анхаарлыг татаж байна. Сонирхолтой нь, ердөө хоёр сарын өмнө Figma компани Claude Code зэрэг хэрэгслээс гаргасан кодыг өөрийн платформ дээр засварлах боломжтой “Code to Canvas” функцийг танилцуулж байсан юм. Түүнчлэн Anthropic-ийн Бүтээгдэхүүн хариуцсан захирал Майк Кригер хэдхэн хоногийн өмнө Figma-ийн Удирдах зөвлөлөөс огцорсон нь тус компани загварчлалын салбарт хүчтэй өрсөлдөгч гаргах гэж буй таамаглалыг бататгасан үйл явдал боллоо.
