Алдарт дуучин Айс Спайс (Ice Spice) түргэн хоолны газар үйлчлүүлж байхдаа нэгэн эмэгтэйд цохиулж буй бичлэг цахим орчинд тархаж, олныг цочирдуулаад байна. Уг хэрэг 2026 оны дөрөвдүгээр сарын 15-нд Лос Анжелес хотын “МакДоналдс” (McDonald’s) сүлжээ рестораны салбарт болсон бөгөөд дуучин бүсгүй болон түүний хуулийн багийнхан албан ёсны мэдэгдэл хийлээ.
Бичлэгээс үзвэл нэгэн эмэгтэй дуучны сууж байсан ширээнд ойртон ирж, үг хэлээр өдөөн, маргалдсаны эцэст халдлага үйлдэж байгаа нь тодорхой харагддаг. Дуучин бүсгүйн өмгөөлөгч Брэдфорд Коэн уг үйлдлийг “ямар ч үндэслэлгүй халдлага” хэмээн тодорхойлоод, хэргийг Лос Анжелес хотын цагдаагийн газарт бүртгүүлсэн болохоо мэдэгдлээ. Тэрээр “Бид гэм буруутай этгээдийг эрүүгийн болон иргэний хариуцлагад татахын тулд бүх хүчээ дайчлан ажиллах болно. Мөн тухайн үйлчилгээний газрын аюулгүй байдлын асуудлыг ч давхар шалгаж байна” гэж онцолсон юм.
Цахим сүлжээнд тархсан бусад бичлэгүүдэд Айс Спайс халдлагаас өөрийгөө хамгаалж, ширээн дээгүүр үсрэн зайлж буй хэсэг бичигдсэн байна. Халдлага үйлдсэн эмэгтэйн зүгээс дуучин бүсгүйг өөртэй нь хэрцгий харьцсан хэмээн тайлбарлаж байгаа ч өмгөөлөгч Коэн үүнийг няцаав. Түүний үзэж буйгаар, уг хэргийг цахим орчинд олон хандалт авах буюу “вирусжуулах” зорилгоор урьдаас төлөвлөн зохион байгуулсан байх магадлалтай ажээ.
