YouTube одооноос таны төрсөн өдрийг шууд итгэж бүртгэхээ болино. Мягмар гарагт тус платформ шинэ “Нас таамаглах” системээ танилцууллаа. Энэ нь хэрэглэгчийн насыг төрөл бүрийн мэдээлэлд үндэслэн таамаглаж, өсвөр насныхныг насанд хүрэгчдэд зориулагдсан контентод хандахаас сэргийлж, “Насанд тохирсон бүтээгдэхүүн, хамгаалалт” үзүүлэх зорилготой.
YouTube-ийн мэдээлснээр, уг нас таамаглах систем ойрын долоо хоногт АНУ-ын “цөөн хэрэглэгчид” дээр туршигдаж эхлээд, энэ оны сүүлээр өргөн хүрээнд нэвтрэх аж. Систем нь машин сургалтын аргаар хэрэглэгчийн насны талаар дүгнэлт хийх бөгөөд үзэж буй видео, хайлт хийдэг төрөл, дансны идэвхтэй байсан хугацаа зэрэг олон дохиог нэгтгэн боловсруулна.
Системийн зорилго нь өсвөр насныхныг илрүүлж, илүү зохистой орчинд оруулах юм. Энэ нь яг юу гэсэн үг вэ? Хэрэв хэрэглэгчийг 18-аас доош гэж үзвэл YouTube дараах алхмуудыг хийнэ:
- Хувийн тохирсон сурталчилгааг унтраана
- Амрах сануулга зэрэг “дижитал сайн сайхны” хэрэгслийг идэвхжүүлнэ
- Тодорхой төрлийн видеог хэт олон давтан үзэхээс сэргийлэх хамгаалалт тавина
Энэ бүхэн нь өсвөр насныхныг хэт туйлширсан эсвэл сөрөг контентын гүн рүү орохоос хамгаалах зорилготой.
Гэхдээ хэрэглэгч өөрийгөө 18-аас дээш насны гэдгээ баталж, хязгаарлалтаас гарах боломжтой. Хэрэв та Minecraft-ийн видеог насанд хүрсэн хүний нухацтай байдлаар үздэг бол үүнийгээ нотлоход л хангалттай. Үүний тулд төрийн олгосон үнэмлэх эсвэл кредит картаар баталгаажуулах хэрэгтэй. Харин систем таныг анхнаасаа насанд хүрсэн гэж дүгнэвэл та ердийн YouTube-ээ ашиглана.
YouTube-ийн энэхүү алхам бол интернэт “насны хяналтын эрин”-д орж байгаагийн илрэл. Энэ сарын эхээр Их Британид насанд хүрэгчдэд зориулсан контент бүхий сайтуудад хэрэглэгчийн насыг баталгаажуулах журам хэрэгжиж эхэлсэн. Үүний үр дүнд Pornhub-аас эхлээд Reddit хүртэл насанд хүрснээ нотлоогүй хэрэглэгчдэд хаалттай болж байна. Хэдий зарим нь VPN ашиглан амархан тойрч байгаа ч ийм төрлийн хууль тогтоомж улам нэмэгдэж байна.
АНУ-д энэ жилийн эхээр Дээд шүүх Техасын насны баталгаажуулалт шаардсан хуулийг Үндсэн хуулийн дагуу гэж үзсэн. Үүнтэй ижил төстэй хууль олон мужид батлагдаж, зарим нь өсвөр насныхныг сөрөг нөлөөтэй нийгмийн сүлжээнээс хамгаалахыг зорьж байгаа ч, нөгөө талаас харилцах, хамт олноо олох боломжийг нь хааж болзошгүй.
YouTube үүнийг аль хэдийн ойлгожээ: Насны баталгаажуулалт хаашаа ч алга болохгүй. “Үнэмлэхээ үзүүлнэ үү.”
Эх сурвалж:
