Европын сагсан бөмбөгийн шилдэг тоглогчид Евробаскет 2025-д өрсөлдөнө
Европын сагсан бөмбөгийн хамгийн шилдэг тоглогчид ирэх намар Евробаскет 2025 тэмцээнд өрсөлдөнө. Найман сарын сүүлээс есдүгээр сарын дунд хүртэл үргэлжлэх энэ тэмцээн Кипр, Финланд, Польш, Латви зэрэг дөрвөн улсад зохион байгуулагдах бөгөөд алтан медалийн тоглолт Рига хотноо болох юм.
Тоглолтуудыг албан ёсоор Courtside 1891 үйлчилгээгээр дамжуулан шууд үзэх боломжтой бөгөөд хэрэглэгчид төлбөр төлөх шаардлагатай.
Олимпийн эрхийн төлөө бус, үндэсний бахархлын төлөө
Евробаскет нь зөвхөн Европын аваргыг тодруулаад зогсохгүй, 2027 оны Дэлхийн аварга шалгаруулах тэмцээнд оролцох эрхийн замыг нээдэг онцлогтой. Олимпийн эрхийн төлөөх тэмцээн биш ч энэ нь улс орнуудын нэр төр, бахархлын төлөөх жинхэнэ тулаан болж өгдөг.
Формат ба өрсөлдөөн
Тэмцээн нийт дөрвөн хэсэгт хуваагдаж, тус бүр нь зургаан багтай. Багууд хэсгийн шатанд таван тоглолт хийнэ. Эхний дөрвөн байр эзэлсэн баг 16-гийн шатанд шалгарч, цааш хасагдах шатны тоглолтуудад өрсөлдөнө. Хагас шигшээд ялагдсан багууд хүрэл медалийн төлөө хүч үзэх бол финалд шалгарсан хоёр баг алт, мөнгөн медалийн төлөө тоглох юм.
Харах ёстой багууд ба тоглогчид
Сагсан бөмбөгийн ертөнцөд анхаарал татахуйц олон баг энэ удаад оролцоно. Серби, Латви, Чехийн тоглолтууд ихээхэн сонирхол татах бөгөөд Германы багийн өсөлт, Литвийн уламжлалт хүчирхэг тоглолт, Испанийн туршлагатай бүрэлдэхүүн онцгой анхааралд байна.
Мэдээж, дэлхийн хэмжээний супер одод болох Яаннис Антетокумпо, Лука Дончич, Никола Йокич зэрэг тоглогчид Европын аваргын тайзнаа гарч, шүтэн бишрэгчдийн хүлээлтийг улам өндөрт өргөх болно.
Евробаскет 2025-ийн хэсгүүдийн тойм
A хэсэг – Кипр улсад
Онцлох багууд: Серби, Чех
- Серби: Никола Йокич тэргүүтэй Серби нь Европын хамгийн хүчтэй багуудын нэг. Тэдний гүн бүрэлдэхүүн, өндөр тоглолтын IQ нь аваргын гол өрсөлдөгч болгож байна.
- Чех: Томаш Саторански тэргүүтэй Чехийн баг сүүлийн жилүүдэд тогтвортой тоглолтоороо Европын тавцанд өөрсдийгөө харуулж байгаа.
Хүлээлт: Серби түрүүлж, Чех хамтдаа шөвгийн 16-д шалгарах магадлал өндөр.
B хэсэг – Финланд улсад
Онцлох багууд: Герман, Литва
- Герман: 2023 оны ДАШТ-ий аваргууд энэ удаад ч хүчтэй бүрэлдэхүүнтэй оролцоно. Деннис Шрёдер болон залуу авьяастнууд Германыг дахин аваргын төлөө өрсөлдөгч болгоно.
- Литва: Европын уламжлалт хүчирхэг багуудын нэг. Жонас Валанчюнас тэргүүтэй баг нь сагсан бөмбөгийн соёл, багийн тоглолтоороо ялгардаг.
Хүлээлт: Герман болон Литва хоёулаа энэ хэсгээс гарах нь тодорхой, хэсгийн эхний байрны төлөө ширүүн өрсөлдөөн болно.
C хэсэг – Польш улсад
Онцлох багууд: Испани, Итали
- Испани: Евробаскетийн олон удаагийн аварга Испани туршлагатай бүрэлдэхүүн, залуу авьяастнуудыг хослуулан оролцож байна. Тэдний тоглолт ямар ч үед тогтвортой байдаг.
- Итали: Симоне Фонтеккио болон бусад оддын ачаар өрсөлдөөнтэй тоглолт үзүүлэх чадвартай.
Хүлээлт: Испани хэсгээ тэргүүлэх боломжтой ч Итали, Турк зэрэг өрсөлдөгчид гэнэтийн сюрприз үзүүлэх магадлалтай.
D хэсэг – Латви улсад
Онцлох багууд: Словени, Латви
- Словени: Лука Дончичийн манлайлал дор Словени сүүлийн жилүүдэд Европын топ багуудын тоонд зүй ёсоор багтаж байна. Түүний тоглолт ганцаараа ч багаа хол авч явах хүчтэй.
- Латви: Өнгөрсөн Евробаскет дээр гайхалтай тоглолт үзүүлсэн бөгөөд энэ удаа эх орондоо тоглож байгаагаараа илүү урам зоригтой байна.
Хүлээлт: Дончичийн Словени хэсгээ тэргүүлэх магадлалтай ч, эх орондоо тоглох Латви тэдэнд амархан бууж өгөхгүй.
Евробаскет 2025 нь зөвхөн аварга шалгаруулах тэмцээн биш, харин Европын сагсан бөмбөгийн ирээдүйн чиг хандлагыг тодорхойлох чухал үйл явдал болох гэж байна. Яаннис, Лука, Йокич зэрэг супер оддоос гадна олон залуу авьяастан өөрсдийгөө харуулах болно.
Эх сурвалж:
What to expect at EuroBasket 2025: Groups, expectations, Giannis, Luka and more
The tournament features 24 of the best European men’s basketball squads and begins on Wednesday.
