Москва хотын амьтны хүрээлэнгийн бэлгэ тэмдэг болсон Тимфей хэмээх мануулд (түүнийг олон нийт цасны ирвэстэй андуурах тохиолдол гардаг ч тэрээр ховор төрлийн зэрлэг муур буюу мануул юм) удамшлын хувьд тохирсон эмэгчин олох ажил хүндрэлтэй байна. Энэ нь эрүүл үр төл гаргах, удамшлын олон янз байдлыг хадгалахад нэн чухал болохыг амьтны хүрээлэнгийн захирал С.Акулова онцолжээ.
Тимфейд хань хайх явцад олон улсын амьтны хүрээлэнгүүдээс татгалзсан хариу ирсэн байна. Тухайлбал, Японы Хигашияама амьтны хүрээлэнгийн төлөөлөгч тэдний мануулууд зээлээр ирсэн тул Орос руу шилжүүлэх боломжгүй гэдгийг мэдэгджээ. Варшавын амьтны хүрээлэн мөн адил татгалзсан бөгөөд тус амьтан Европын ховордсон зүйлийн төслийн (EEP) нэг хэсэг тул шилжүүлэх эрх мэдэл байхгүйг дурдсан байна.
Үүнээс гадна Францын Spaycific’Zoo болон Финляндын амьтны хүрээлэнгүүд эмэгчин мануул шилжүүлэх боломжгүйгээ илэрхийлжээ. Нидерландын Роттердам болон Шведийн Nordens Ark амьтны хүрээлэнгүүд энэ асуудлыг зөвхөн Европын ховордсон зүйлийн төслийн зохицуулагч шийдвэрлэдэг болохыг тайлбарласан байна.
Тимфей нь 2020 онд Новосибирск хотод төрсөн бөгөөд Москва хотын амьтны хүрээлэнд ирсэн цагаасаа хойш олны хайрыг татах болсон юм. Тэрээр өвлийг угтан биеийн жин нь нэмэгддэг “зажировка” хэмээх онцлог үйл явцаараа олон нийтийн сүлжээнд маш их алдаршсан билээ.
Мануул нь 2020 оноос хойш Олон Улсын Байгаль Хамгаалах Холбооны (IUCN) Улаан жагсаалтад “устах эрсдэл бага” буюу хамгийн бага анхаарал шаардах зүйлийн ангилалд багтаж байгаа ч амьтны хүрээлэнгүүдийн дундах үржүүлгийн хөтөлбөр нь төрөл зүйлийг хамгаалахад чухал үүрэг гүйцэтгэсээр байна.
