Боксын нэрт дасгалжуулагч, тайлбарлагч Тэди Атлас өөрийн YouTube сувгаар дамжуулан велтервейт буюу хагас дунд жингийн (66.7 кг) түүхэн дэх хамгийн агуу 10 тулаанчийг тодрууллаа. Энэхүү жин нь боксын түүхэнд хамгийн өрсөлдөөнтэй, олон одод төрөн гарсан жинд тооцогддог бөгөөд Атлас өөрийн баялаг туршлага дээр үндэслэн жагсаалтаа гаргажээ.
Орчин үеийн боксчдоос Флойд Мэйуэзер, Феликс Тринидад болон Теренс Кроуфорд зэрэг нэрс энэ жинд ялагдашгүй амжилт үзүүлсэн ч Атлас түүхийн хуудсыг сөхөж, “Sugar” Рэй Робинсоныг бүх цаг үеийн хамгийн шилдэг нь хэмээн онцолсон байна. Түүний үзэж буйгаар Робинсон бол зөвхөн энэ жинд төдийгүй боксын бүх жингийн түүхэнд хамгийн агуу нь байх магадлалтай аж.
Рэй Робинсон замналынхаа туршид 173 ялалт байгуулж, үүнээс 108-ыг нь нокаутаар дуусгасан гайхалтай амжилттай. Тэрээр 91 тулаан дараалан ялагдал үзээгүй бөгөөд хагас дунд болон дунд жингийн дэлхийн аварга цолыг эзэмшиж байв. Тэди Атлас түүнийг хэрэв цаг агаарын таагүй нөхцөл байдал байгаагүй бол гурав дахь жин буюу хагас хүнд жингийн аварга болох бүрэн боломжтой байсныг дурджээ.
1952 онд Нью-Йоркийн “Yankee Stadium”-д болсон хагас хүнд жингийн аваргын төлөөх тулааны үеэр рингний температур 40 хэмээс давж, маш халуун байсан юм. Тулааныг шүүж байсан шүүгч хүртэл халуунд цохигдож, рингнээс солигдож байсан түүхтэй. Робинсон 13-р раунд хүртэл оноогоор илүүрхэж байсан ч хэт халууны улмаас бие нь дийлэлгүй ухаан алдан унаснаар техникийн нокаутаар ялагдаж, гурав дахь жингийн аварга болох боломжоо алдаж байжээ. Иймээс Тэди Атлас түүнийг ур чадвар, тэсвэр хатуужлын хувьд хэнтэй ч зүйрлэшгүй нэгэн гэдгийг ийнхүү баталсан байна.
