АНУ-ын Армийн сайд Дэн Дрисколл Батлан хамгаалахын сайд Пит Хегсеттэй харилцаа нь хурцадмал байгаа болон албан тушаалаасаа огцрох гэж буй тухай мэдээллүүдэд албан ёсоор хариу өглөө. Тэрээр албан тушаалаа орхих бодолгүй байгаагаа мэдэгдсэн төдийгүй Пит Хегсетийг орлож магадгүй гэх таамаглалд цэг тавьсан юм.
Ерөнхийлөгч Дональд Трампын кабинетын дотоод бүтцэд өөрчлөлт орж болзошгүй байгаа нь Батлан хамгаалахын сайд Хегсетийн байр суурийг ганхуулж эхэлсэн байна. Ялангуяа Ирантай үүссэн зөрчилдөөн шийдэгдэхгүй байгаа нь түүний ажлаасаа халагдах нэг шалтгаан болж магадгүй гэж ажиглагчид үзэж байгаа юм. “Нью-Йорк Пост” сонинд мэдээлснээр, Хегсет өөрийнх нь суудалд Дрисколл ирж магадгүй хэмээн болгоомжилж байсан нь Армийн жанжин штабын дарга Рэнди Жорж болон бусад өндөр тушаалтнуудыг ажлаас нь чөлөөлөх гол хөшүүрэг болсон гэжээ.
Дэн Дрисколл “Вашингтон Пост” сонинд өгсөн ярилцлагадаа “Ерөнхийлөгч Трампын удирдлага дор ажиллах нь миний хувьд нэр төрийн хэрэг. Би Америкийн армийг дэлхийн хамгийн хүчирхэг хүчин болгохын төлөө шаргуу ажиллаж байгаа бөгөөд ажлаасаа явах төлөвлөгөө алга” хэмээн онцолсон байна. Тэрээр Вице-ерөнхийлөгч Ж.Д.Вэнстэй олон жилийн нөхөрлөлийн холбоотой бөгөөд Цагаан ордны зүгээс ч өндөр дэмжлэг авч байгаа юм.
Цагаан ордны төлөөлөгч Анна Келли Ерөнхийлөгч Трамп сайд Дрисколлын гүйцэтгэж буй үүргийг өндрөөр үнэлж, цэргийн бэлэн байдал сэргэж байгааг тэмдэглэв. Хэдийгээр Батлан хамгаалах яамны зүгээс удирдлагууд хоорондоо нягт хамтран ажиллаж байгаа гэж мэдэгдэж байгаа ч зарим албаны эх сурвалжууд Хегсет болон Дрисколл нарын хооронд эрх мэдлийн далд тэмцэл үргэлжилсээр байгааг дурдсан байна.
Дрисколлын энэхүү мэдэгдэл нь түүнийг Хегсетийн оронд очих магадлалтай гэх яриаг намжаахын зэрэгцээ Армийн удирдлагад өөрийн байр суурийг улам бататгаж буй алхам боллоо.
