Дэлхийн поп од Жастин Бибер алдарт “Coachella” хөгжмийн наадмын тайзнаа эргэн ирсэн ч түүний тоглолт шүүмжлэлийн бай болоод байна. Учир нь тэрээр хоёр амралтын өдөр тоглохдоо 10 сая ам.долларын хөлс авсан нь тус наадмын түүхэн дэх хамгийн өндөр үнэлгээтэй үзүүлбэрт тооцогдож байсан юм. Энэхүү тоглолтыг түүний карьерын “шинэ эрин үе”-ийн эхлэл хэмээн тодорхойлж байсан ч бодит байдал дээр үзэгчдийн хүлээлтэд хүрсэнгүй.
Тоглолтын дараа хэвлэл мэдээллийнхэн болон олон нийтийн сүлжээний хэрэглэгчид түүний үзүүлбэрийг “залхуу” хэмээн шүүмжилж эхлэв. Жастин Бибер тайзан дээр өөрийн хуучин клипүүдийг YouTube-ээс тоглуулж, анх хэрхэн олдсон тухайгаа дурсамж маягаар ярьж цаг нөхцөөсөн нь шүүмжлэлийн гол шалтгаан болжээ. “Хамгийн өндөр цалинтай уран бүтээлч Coachella-ийн тайзан дээр ийм байдалтай тоглож байгаа нь харамсалтай” хэмээн нэгэн шүүмжлэгч онцолсон байна.
Гэсэн хэдий ч түүний тоглолт асар их үзэгчдийг татаж чадсан бөгөөд Dijon, Tems зэрэг уран бүтээлчидтэй хамтран дуулсан нь тодорхой хэмжээнд амьд уур амьсгал оруулжээ. Энэхүү тоглолт нь тэрээр 2022 онд эрүүл мэндийн шалтгаанаар “Justice” дэлхийн аялан тоглолтоо цуцалснаас хойш гаргасан хамгийн том үзүүлбэр байсан юм. Хэдийгээр санхүүгийн хувьд түүхэн амжилт тогтоосон ч, уран бүтээлчийн хувьд шүүмжлэгчдээс өндөр үнэлгээ авч чадсангүй.
