“Marvel Rivals” тоглоомонд шинээр нэмэгдэж буй “Black Cat” (Фелиция Харди) баатрын сурталчилгааны видео болон дүрийн загвар нь эмэгтэй хүний биеийг хэт бэлгийн шинжтэйгээр харуулсан гэх шалтгаанаар олон нийтийн зүгээс хүчтэй шүүмжлэлтэй тулгарлаа.
Зохисгүй байрлал ба маркетингийн заль
4-р сарын 17-нд нээлтээ хийж буй тус баатрын танилцуулга дээр түүний чадвар, тоглолтын хэв маягаас илүүтэйгээр дүрийн зогсолт, байрлал нь хэл ам дагуулж байна. Тухайлбал, дүр сонгох цэсэд Black Cat нь байнга бөхийж, өвдөглөсөн мэт байрлалтай харагддаг нь хэрэглэгчдийн дунд “зориуд эмэгтэйлэг байдлыг бэлгийн өдөөлт болгон ашиглаж, хувцас (skin) зарах гэсэн оролдлого” гэж үзэгджээ.
Өмнө нь тоглоом хөгжүүлэгч “NetEase” компани эмэгтэй баатруудыг хэт бэлгийн шинжтэй харуулдаг гэх шүүмжлэлийг үгүйсгэж байсан ч, энэ удаагийн “Black Cat”-ийн дүрслэл нь уг тайлбарыг эргэлзээтэй болгож байна. Олон нийтийн сүлжээнд “Энэ бол эмэгтэйчүүдийг хүн биш, зөвхөн бэлгийн бай болгон харуулж буй хэлбэр” гэсэн шүүмжлэлүүд хүчтэй өрнөж байна.
Зарим тоглогчид Black Cat нь комик ном дээрээ ч иймэрхүү өдөөн хатгасан байрлалтай байдаг гэж өмөөрч байгаа ч, шүүмжлэгчид үүнийг комик номын хэв маягийг буруугаар ашигласан хэтрэлт гэж үзэж байна. Энэ асуудал нь өмнө нь “Overwatch”, “Street Fighter” зэрэг тоглоомуудад ч тохиолдож байсан бөгөөд видео тоглоомын салбарт эмэгтэй дүрийг бэлгийн объект болгох нь нийгэмд буруу ойлголт төрүүлэх эрсдэлтэйг мэргэжилтнүүд онцолсоор ирсэн.
Black Cat-д зориулан гаргаж буй “Urban Predator” нэртэй анхны хувцасны багц нь богино банзал, таслагдсан цамцтай байгаа нь маркетингийн багийн зорилгыг улам тодорхой болгож байна. Хөгжүүлэгчид энэ төрлийн “гаж” сонирхолтой хэрэглэгчдийг татах замаар ашиг олохыг эрмэлзэж байгаа нь “Marvel Rivals”-ийн нэр хүндэд сөргөөр нөлөөлж болзошгүй байна.
