Intel компани сүүлийн жилүүдэд процессоруудынхаа нэршлийг өөрчилж, уламжлалт i3/i5/i7/i9 ангиллаас татгалзан “Core Ultra” брэндийг гол бүтээгдэхүүнээ болгоод байгаа билээ. Core Ultra Series 1, 2, 3 цувралууд нь цоо шинэ CPU, GPU дизайн болон үйлдвэрлэлийн дэвшилтэт технологи дээр суурилан гарч ирсэн юм.
Гэвч өмнө нь Intel-ийн санал болгож байсан “Ultra” бус буюу энгийн Core Series 1 болон Series 2 чипүүд нь хэрэглэгчдийн сонирхлыг төдийлөн татаж чадахгүй байв. Учир нь эдгээр нь Intel-ийн хуучин “Raptor Lake” архитектур дээр суурилсан байсан юм. “Raptor Lake” нь 2023 оны 13-р үеийн Core цувралын код нэр бөгөөд тэдгээрийн ихэнх нь бүр 2022 оны 12-р үеийн процессоруудад ашигласан технологитой ижил байсан нь шүүмжлэл дагуулдаг байлаа.
Харин энэ удаад Intel хуучин технологийг дахин ашиглах буюу “ребрэнд” хийхээс татгалзлаа. Шинээр танилцуулж буй Core Ultra бус Series 3 процессорууд нь цоо шинэ чип дээр суурилж байгаагаараа онцлог юм. Энэ нь Intel-ийн өндөр болон дунд зэрэглэлийн процессорууд гүйцэтгэлийн хувьд ялгаатай ч, технологийн хувьд ижил түвшний дэвшилтэт шийдлийг агуулдаг байсан тэрхүү алтан үе эргэн ирснийг илтгэж байна. Ингэснээр хэрэглэгчид заавал хамгийн үнэтэй “Ultra” загварыг сонгохгүйгээр орчин үеийн архитектурын давуу талыг мэдрэх боломж бүрдэж байгаа юм.
