Meta компанийн хиймэл оюун ухааны лабораторийн нөхцөл байдал үнэхээр самуунтай байгаа тухай Financial Times мэдээлжээ. Тус компанид саяхан элссэн ажилчид хэдхэн хоногийн дотор ажлаа орхихоо мэдэгдэж, зарим тохиолдолд үлдээхийн тулд өндөр тушаал санал болгож байгаа нь ил болсон байна.
Өндөр албан тушаалаар үлдээсэн нь
Meta-ийн “ерөнхий AI эрдэмтэн” хэмээх нэр хүндтэй албан тушаалыг эзэмшиж буй Шэнжя Жао энэ нөхцөл байдлын тод жишээ юм. Тэрээр өмнө нь OpenAI-д ажиллаж, ChatGPT-ийн хөгжүүлэлтэд оролцсон туршлагатай. Харин Meta-д орсон даруйдаа дотоод үйл ажиллагааг “замбараагүй шоу” гэж үзэн гарахаар шийдсэн байна. Түүгээр ч барахгүй OpenAI-д эргэн элсэхээр баримт бичигт гарын үсэг зурсан ч, Meta түүнийг тогтоон барихын тулд шууд өндөр албан тушаал санал болгожээ. Энэ нь Силикон хөндий үнэхээр “меритократ” биш гэдгийг батлах нэг баримт болж байна.
Шилдэг ажилчид олноороо гарч байна
Жаогоор хязгаарлагдахгүй, Meta-д өндөр үнэлэгдсэн олон мэргэжилтнүүд ч мөн адил богино хугацаанд ажлаа орхисон байна. Wired-ийн мэдээлснээр OpenAI-ийн хуучин ажилчид Итан Найт, Ави Верма болон Google DeepMind-ийн Ришаб Агарвал нар ердөө хэдхэн сар ажиллаад гарсан бол, FT-ийн тооцоогоор Meta-д олон жил ажилласан хоёр арван гаруй ахмад ажилчид сүүлийн хэдэн долоо хоногт ажлаа орхижээ.
Энэ бүхнийг харахад тэднийг буруутгах аргагүй. Сүүлийн зургаан сарын дотор Meta хиймэл оюун ухааны багтаа дөрөв дэх томоохон шинэчлэлээ хийж байгаа бөгөөд компани зах зээлд хоцорч буйгаа нөхөхийн тулд салбарын хамгийн алдартай мэргэжилтнүүдэд асар өндөр цалин, урамшуулал санал болгож байна. Гэвч Зукерберг метаверсийн төсөлд бүх анхаарлаа хандуулж байхдаа хиймэл оюун ухааны хувьсгалыг тоогоогүй. Харин одоо хоцролтоо нөхөх гэж их хэмжээний хөрөнгө зарцуулж байгаа ч бодит байдал дээр улам л ардаа хоцорсоор байна.
Александра Вангийн асуудал
Мөн энэ самууныг нэмэгдүүлсэн нэг шалтгаан бол Scale AI-ийн үүсгэн байгуулагч асан Александра Вангийн оролцоо. Зукерберг Scale AI-г 15 тэрбум ам.доллар (52.5 их наяд төгрөг)-оор худалдан авч, түүнийг Meta-ийн Ерөнхий AI офицероор томилсон. Гэвч FT-ийн мэдээлснээр, Ван ажилчидтайгаа үл ойлголцож, өөрийн удирдлагын хэв маягаараа сөрөг сэтгэгдэл төрүүлж, Зукербергтэй ч зөрчилдөж байгаа аж.
Мөнгөөр шийдэх аргагүй асуудал
Meta асар их хөрөнгөтэй учир шилдэг мэргэжилтнүүдийг татан авах замаар асуудлаа түр хугацаанд намжааж чадна. Гэвч Зукербергийн хувьд ямар ч их мөнгөөр авъяаслаг хүмүүсийн итгэлийг хожих боломжтой ч, өөрийн зан төлөвөө өөрчлөхийг худалдаж авч чадахгүй.
Эх сурвалж: Gizmodo
