Дэлхийн шилдэг мэргэжлийн тоглогч Faker буюу Ли Сон Хёк өнгөрсөн 13 жилийн турш цахим спортын оргилд хэрхэн оршин тогтнож буй туршлага, сэтгэлзүйн бэлтгэл болон цаашдын зорилгынхоо талаар “Fortune Korea” сэтгүүлд дэлгэрэнгүй ярилцлага өгчээ.
Тэрээр 2018 оны орчимд өөрийн ур чадвар буурч байгаа мэт мэдрэмж төрж, нас ахих тусам тоглолтод нь нөлөөлж буй эсэхэд эргэлзэж эхэлсэн тухайгаа хуваалцсан байна. Хэдийгээр гурван удаагийн дэлхийн аварга болсон байсан ч тоглогчийн хувиар хэр удаан замналаа үргэлжлүүлж чадах вэ гэх асуулт түүний өмнө тулгарчээ. Ингээд тэрээр илүү шаргуу бэлтгэл хийж, өөрийгөө шинээр батлах замыг сонгосон байна.
Үүний үр дүнд Faker амжилтаа ахиулж, тав дахь удаагаа дэлхийн аварга болж чадсан төдийгүй T1 багийг дэлхийн шилдэг хэвээр үлдээхэд гол үүрэг гүйцэтгэсэн юм. Ялангуяа 2023 онд бугуйн гэмтэлтэй байсан ч багтайгаа хамт дэлхийн аварга шалгаруулах тэмцээнд түрүүлсэн нь түүний карьерын хамгийн бахархалт мөчүүдийн нэг байсан гэдгийг онцолжээ.
Түүний ийм урт удаан хугацаанд тогтвортой тоглож буй нууц нь ном унших сонирхолтой нь шууд холбоотой аж. Faker сэтгэлзүй болон бусад олон төрлийн чиглэлээр их уншдаг бөгөөд энэ нь оюун ухаанаа цэгцлэх, тоглоомын ачааллаас хөндийрч амрахад нь тусалдаг байна. Тэрээр зөвхөн цахим спортын нүүр царай болоод зогсохгүй, “Goyard” зэрэг тансаг зэрэглэлийн брэндүүдийн сурталчилгаанд тоглож байгаа нь түүний дэлхий дахинд үзүүлэх нөлөө хэр их болсныг батлан харуулж байна.
