“Ал-Насср” багийн дасгалжуулагч Хорхе Жезус тоглолтын дараа өгсөн ярилцлагадаа багийн ахлагч Криштиану Роналдугийн биеийн байдлын талаар онцлох мэдээлэл өглөө. Түүний хэлснээр, Роналду “Ал-Эттифак” багийг 1:0 харьцаатай хожсон тоглолтын турш ходоодны өвдөлт болон ерөнхий тавгүйтэлтэй байсан бөгөөд тоглолт дууссаны дараа шууд хувцас солих өрөө рүү орж бөөлжсөн байна.
Биеийн байдал нь хүнд байсан ч Роналду талбай дээрх үүргээ нэр төртэй биелүүлж, хожлын гоол ороход шийдвэрлэх хувь нэмэр оруулжээ. Түүний алсын зайнаас хүчтэй цохисон бөмбөгийг хаалгач хаасан боловч ойж ирсэн бөмбөгийг Кингсли Коман соргог мэдэрч, хаалганд цохиж оруулсан юм.
Энэхүү ялалт нь “Ал-Насср” багийн хувьд Саудын Арабын лигт дараалан авч буй 15 дахь хожил бөгөөд тэд ийнхүү хүснэгтийн тэргүүн байраа найдвартай хадгалж үлдлээ. Роналду энэ улиралд лигийн хүрээнд 24 гоол оруулаад байгаа бөгөөд мэргэн буучдын жагсаалтын гуравдугаарт бичигдэж байна.
Тоглолтын дараа Криштиану Роналду өөрийн нийгмийн сүлжээндээ “+3 оноо. Хөгжөөн дэмжигчдийн энерги гайхалтай байлаа” хэмээн нийтэлж, багийнхаа амжилтаар бахархаж буйгаа илэрхийлжээ.
