Бобби Томасын сүүлийн мөчид оруулсан шийдвэрлэх гоолын ачаар “Ковентри Сити” клуб 25 жилийн дараа Английн хөлбөмбөгийн дээд дивизион болох Премьер лигт эргэн орох эрхээ албан ёсоор авлаа. “Блэкберн Роверс”-ын талбайд болсон тоглолтын төгсгөлд тэд нэг оноо авч чадсанаар энэхүү түүхэн амжилтаа баталгаажуулсан юм.
Тоглолтын турш “Ковентри” клуб эрсдэл гаргахаас зайлсхийж, болгоомжтой тоглож байв. Гэвч 84 дэх минутад Риоя Моришита гоол оруулж, “Блэкберн” тэргүүлж эхэлсэн нь байдлыг хүндрүүлсэн. Харин тоглолтын төгсгөлд Бобби Томас торгуулийн цохилтоос ирсэн дамжуулалтыг өндөрт үсэрч, толгойгоороо хүчтэй мөргөн гоолдож, тооны харьцааг тэнцүүлж чадсан юм.
Багийн ахлах дасгалжуулагч Фрэнк Лэмпард: “Энэ бол гайхалтай мөч байлаа. Тоглолтын хэмнэл бидний хүссэн шиг хурдан байж чадаагүй ч, Бобби Томасын гоол болон бөмбөгийн гүйцэтгэл үнэхээр гайхалтай байсан” хэмээн багийнхаа хичээл зүтгэлийг онцоллоо.
“Ковентри Сити” клуб 2017 онд дөрөвдүгээр лиг хүртэл ухарч байсан хүндхэн түүхтэй. Гэвч тэд сүүлийн жилүүдэд тасралтгүй ахиж дэвшсээр ирсэн бөгөөд энэ улиралд лиг дуусахаас гурван тойргийн өмнө Премьер лигийн эрхээ шууд авч чадсан нь онцгой амжилт болж байна.
“25 жилийн дараа ийм амжилт гаргана гэдэг гайхамшигтай. Энэ бол маш хүчтэй клуб. Марк Робинс энд суурийг нь маш сайн тавьж, гайхалтай ажил хийсэн. Ихэнх багууд шиг санхүүгийн тусгай дэмжлэггүйгээр ийм эрт Премьер лигт шалгарна гэдэг үнэхээр бахархмаар зүйл” хэмээн Лэмпард сэтгэгдлээ хуваалцсан байна.
За тэгвэл premier league-д харах шинэ багтай боллоо