АНУ болон Иран улсууд энэ амралтын өдрүүдэд хэлэлцээг үргэлжлүүлэхээр товлосон ч Ираны цөмийн хөтөлбөр болон Хормузын хоолой дахь тээврийн аюулгүй байдлын асуудал тодорхойгүй хэвээр байна.
Иран улсын зүгээс АНУ-ын тавьсан хориг арга хэмжээ цуцлагдахгүй бол Хормузын хоолойг бүрэн хаахаа дахин заналхийллээ. Харин АНУ-ын Ерөнхийлөгч Дональд Трамп хэлэлцээ үр дүнд хүрэхгүй бол гал зогсоох хэлэлцээрийг цуцлах магадлалтай байгаагаа мэдэгдсэн байна. АНУ-ын зүгээс Ираныг хуримтлуулсан цөмийн түлшээ улсаасаа гаргахыг шаардаж байгаа ч Тегеран үүнийг эрс эсэргүүцэж байгаа юм.
Өнгөрсөн даваа гарагт Хормузын хоолойгоор шингэрүүлсэн хий тээвэрлэгч дөрвөн хөлөг онгоц болон газрын тос, химийн бүтээгдэхүүний хэд хэдэн танкер дамжин өнгөрсөн нь мөргөлдөөн эхэлснээс хойшхи анхны томоохон хөдөлгөөн боллоо. Гэсэн хэдий ч Иран улс бүх арилжааны хөлөг онгоцуудыг Исламын хувьсгалт харуулын корпустай (IRGC) үйл ажиллагаагаа зохицуулахыг шаардаж байгаа бөгөөд “дайсны хүчний” хөлөг онгоцуудыг нэвтрүүлэхийг хориглоод байна.
Дэлхийн эдийн засагт стратегийн өндөр ач холбогдолтой тус бүс нутгийн тогтворгүй байдал олон улсын анхаарлын төвд байна. Их Британийн Гадаад хэргийн сайд Иран улсыг олон улсын далайн тээврийг бүрэн сэргээхийг уриалж, энэ нь дэлхийн эдийн засагт шийдвэрлэх нөлөөтэйг онцоллоо.
Одоогоор АНУ болон Ираны хооронд шууд хэлэлцээ хийгдэх эсэх нь тодорхойгүй байгаа ч Пакистаны армийн жанжин Асим Мунир Тегеранд айлчлан, зуучлалын үүрэг гүйцэтгэж байгаа нь нөхцөл байдлыг зөөлрүүлэхэд чухал алхам болно хэмээн шинжээчид үзэж байна.
